මාසයකට අධික කාලයක් තිස්සේ ඉරානය සමඟ පවතින යුද්ධය ඉතා සාර්ථක ලෙස “අවසන් අදියරට” පැමිණ ඇති බව ඇමරිකානු ජනාධිපති ඩොනල්ඩ් ට්රම්ප් ප්රකාශ කරනවා. ඊයේ (අප්රේල් 1) සන්ධ්යාවේ ධවල මන්දිරයේ සිට විශේෂ ප්රකාශයක් සිදු කරමින් ජනාධිපතිවරයා මේ බව කියා සිටියා.
මෙම යුදමය වාතාවරණය හේතුවෙන් ගෝලීය වශයෙන් දැවැන්ත ආර්ථික අර්බුදයක් නිර්මාණය වී තිබුණද, ඇමරිකාවේ සියලුම හමුදාමය අරමුණු මේ වන විටත් ඉටු කරගෙන ඇති බවයි ට්රම්ප් පවසන්නේ. “ඉරානය විසින් ඇමරිකාවට සහ ලෝකයට එල්ල කළ දැවැන්ත තර්ජනය අවසන් කිරීමේ අද්දර අපි සිටිනවා. දැන් සියලුම තුරුම්පු තිබෙන්නේ අප සතුයි. ඔවුන් සතුව කිසිවක් නැහැ,” යනුවෙන් ජනාධිපතිවරයා සිය විනාඩි 19ක කතාවේදී අවධාරණය කළා.
ඉරානය විසින් හෝර්මුස් සමුද්ර සන්ධිය (Strait of Hormuz) අවහිර කරමින් ලොව පුරා ඉන්ධන සහ වෙළඳ නෞකාවලට ප්රහාර එල්ල කිරීම හේතුවෙන් ගෝලීය වෙළඳපොලේ බොරතෙල් මිල විශාල ලෙස ඉහළ ගිය අතර, ඇමරිකාවේ ඉන්ධන මිලද 2022 වසරෙන් පසු පළමු වතාවට ගැලුමක් ඩොලර් 4 ඉක්මවා ගියා. කෙසේ වෙතත් ට්රම්ප් පවසන්නේ ඉරාන නාවික සහ ගුවන් හමුදාවන් මේ වන විට සම්පූර්ණයෙන්ම විනාශ කර ඇති බවයි. නමුත් තවදුරටත් ඉදිරි සති කිහිපය තුළ ඉරානයට දැඩි ප්රහාර එල්ල කරන බවද හෙතෙම සඳහන් කළා.
පසුගිය පෙබරවාරි 28 වනදා ආරම්භ වූ මෙම බිහිසුණු යුද්ධය හේතුවෙන් මේ වන විට ඉරානයේ පුද්ගලයන් 1,900කට අධික පිරිසක් සහ ලෙබනනයේ 1,300කට අධික පිරිසක් මියගොස් ඇති බව ජාත්යන්තර වාර්තා පෙන්වා දෙනවා. එසේම ඊශ්රායලයේ 19 දෙනෙකු සහ ඇමරිකානු සෙබළුන් 13 දෙනෙකුද මෙහිදී ජීවිතක්ෂයට පත්ව තිබේ.
යුද්ධය මැද ඉරාන ජනාධිපති මසූඩ් පෙසෙෂ්කියන් (Masoud Pezeshkian) එක්ස් (X) ගිණුම ඔස්සේ ලිපියක් පළ කරමින් ඇමරිකානු ජනතාවගෙන් ප්රශ්න කර සිටියේ මෙම යුද්ධයෙන් ඇමරිකානු ජනතාවට ඉටුවන සේවය කුමක්ද යන්නයි. තවද, මෙම යුද්ධයට එක්වීමට අකමැති වූ නේටෝ (NATO) සංවිධානයේ මිත්ර රටවල් සමඟද ඩොනල්ඩ් ට්රම්ප් දැඩි කෝපයෙන් පසුවන අතර, ඔහු මීට පෙර රොයිටර් පුවත් සේවයට පවසා තිබුණේ ඇමරිකාව නේටෝ සංවිධානයෙන් ඉවත් වීමට පවා සලකා බලමින් සිටින බවයි.
