ඉරානයේ සියලුම වරායන් සහ වෙරළබඩ ප්රදේශ ඉලක්ක කරගනිමින් ඇමරිකානු නාවික හමුදාව විසින් පනවනු ලබන දැඩි නාවික අවහිරතාව (Blockade) අද (13) දින සිට ක්රියාත්මක කිරීමට ජනාධිපති ඩොනල්ඩ් ට්රම්ප් තීරණය කර තිබේ. පාකිස්ථානයේ පැවැති සාම සාකච්ඡා එකඟතාවයකින් තොරව අවසන් වීමත් සමඟ ට්රම්ප් මෙම තීරණය ගෙන ඇති අතර හෝමුස් සමුද්ර සන්ධියට ඇතුළු වන හෝ ඉන් පිටවන සියලුම ඉරාන නැව් පරීක්ෂාවට ලක් කිරීමට හෝ අවහිර කිරීමට ඇමරිකානු හමුදාවන්ට නියෝග කර ඇත.
ප්රධාන වශයෙන් ඉරානයට ආර්ථික පීඩනයක් එල්ල කරමින් හෝමුස් සමුද්ර සන්ධිය නැවත විවෘත කිරීමට බල කිරීම මෙහි අරමුණ වුවද නාවික අවහිරතාවයක් පැනවීම යනු යුදමය ක්රියාවක් (Act of War) බව විදේශ ප්රතිපත්ති විශේෂඥයෝ පෙන්වා දෙති. මෙමගින් දැනට පවතින දුර්වල සටන් විරාමය බිඳ වැටී කලාපය තුළ යළිත් මහා පරිමාණ යුද්ධයක් ඇති විය හැකි බවට ඔවුන් අනතුරු අඟවයි. විශේෂයෙන්ම ඉරානය මෙයට ප්රතිචාර වශයෙන් සමුද්ර සන්ධිය තුළ බෝම්බ ඇටවීම හෝ වෙනත් ප්රහාර එල්ල කිරීමට ඉඩ ඇති බව සෙනෙට් මන්ත්රී මාර්ක් වෝනර් වැනි නායකයින් ප්රකාශ කර තිබේ.
ඇමරිකානු මධ්යම විධානය (CENTCOM) පවසන්නේ වොෂින්ටන් වේලාවෙන් අද උදෑසන 10 සිට (ග්රීනිච් වේලාවෙන් 14:00 ට) මෙම අවහිරතාව ක්රියාත්මක වන බවයි. ඉරානය සමඟ ගනුදෙනු කරන හෝ ඔවුන්ට ගාස්තු ගෙවන කිසිදු නෞකාවකට ආරක්ෂිත ගමන් මගක් ලබා නොදෙන බවට ද ට්රම්ප් අනතුරු අඟවා ඇත. මෙම තත්ත්වය හමුවේ ලෝක වෙළඳපොළේ ඉන්ධන මිල තවදුරටත් ඉහළ යාමේ අවදානමක් පවතින අතර එය ඇමරිකාවේ ඉදිරි මැතිවරණවලට ද බලපෑ හැකි බව දේශපාලන විචාරකයෝ පවසති.
