මධ්යම පෙරදිග පවතින යුදමය වාතාවරණය අවසන් කිරීම සඳහා ඉදිරිපත් කර ඇති සාම සැලැස්මට ටෙහෙරානය එකඟ නොවන්නේ නම්, ඉරානය වෙත දැවැන්ත ප්රහාරයක් එල්ල කිරීමට ජනාධිපති ඩොනල්ඩ් ට්රම්ප් සූදානම් බව ධවල මන්දිරය නිල වශයෙන් නිවේදනය කර තිබේ. ධවල මන්දිර මාධ්ය ලේකම් කැරොලයින් ලෙවිට් ප්රවෘත්ති සාකච්ඡාවකදී අවධාරණය කළේ ඉරානය සිය හමුදාමය පසුබෑම සහ පවතින යථාර්ථය පිළිගැනීමට අපොහොසත් වුවහොත්, මීට පෙර කිසිදා නොවූ විරූ ප්රබල ප්රහාරයකට මුහුණ දීමට ඔවුන්ට සිදුවන බවයි.
බීබීසී පුවත් සේවය වාර්තා කරන පරිදි, ජනාධිපති ට්රම්ප්ගේ මෙම ප්රකාශය හුදෙක් බිය වැද්දීමක් නොවන බවත්, ඉරානය නැවත වරක් වැරදි ගණන් බැලීම් නොකළ යුතු බවත් මාධ්ය ලේකම්වරිය වැඩිදුරටත් සඳහන් කළාය. ඇමරිකානු සාකච්ඡාකරුවන් විසින් කරුණු 15කින් සමන්විත නව සාම සැලැස්මක් ඉරාන පාලන තන්ත්රය වෙත යොමු කර ඇති අතර, එය පිළිගන්නා ලෙස ධවල මන්දිරය මේ වන විට දැඩි බලපෑම් එල්ල කරමින් සිටී.
කෙසේ වෙතත්, ඉරානය මෙම සාම යෝජනාව ප්රතික්ෂේප කරමින් ප්රතිචාර දක්වා ඇති බව වාර්තා වේ. ඉරානයේ මෙම තීරණයත් සමඟ දෙරට අතර සැබෑ රාජ්ය තාන්ත්රික විසඳුමක් කරා යාමට ඇති හැකියාව පිළිබඳව දැඩි සැකයක් මතුව ඇත. මෙම නොසන්සුන්කාරී තත්ත්වය හේතුවෙන් ඉදිරි දින කිහිපය තුළ කලාපීය ආරක්ෂාව පිළිබඳව ලෝක ප්රජාව දැඩි අවධානයෙන් පසුවෙයි.
