බ්රිතාන්යයේ වයස අවුරුදු 30ට අඩු ආබාධිත රියදුරන් සඳහා ඔවුන් පදවන ‘Motability’ රථ වාහනවලට අනිවාර්යයෙන්ම කළු පෙට්ටි (Black-box trackers) සවි කළ යුතු බවට පනවා ඇති නව රීතියක් හේතුවෙන් එරට ආබාධිත ප්රජාව දැඩි කනස්සල්ලට සහ කෝපයට පත්ව සිටිනවා.
මෙම කළු පෙට්ටි මඟින් රියදුරුගේ වේගය සහ තිරිංග තද කිරීම් වැනි රිය පැදවීමේ පුරුදු නිරීක්ෂණය කර සතිපතා ශ්රේණිගත කිරීමක් ලබා දෙනු ලැබේ. මාස 12ක් ඇතුළත රියදුරෙකු ‘රතු ශ්රේණිගත කිරීම්’ (Red ratings) හතරකට වඩා ලබාගතහොත්, රජයේ ආධාර මුදල් භාවිතයෙන් නව වාහන බදු පදනමට (Lease) ලබාගත හැකි මෙම සුවිශේෂී Motability ක්රමයෙන් ඔවුන්ව ඉවත් කිරීමට කටයුතු කරනු ඇත. උතුරු අයර්ලන්තයේ මෙම ක්රමය පසුගිය සැප්තැම්බර් මාසයේදී අත්හදා බැලූ අතර මේ වන විටත් රියදුරන් 300ක් පමණ එම ක්රමයෙන් ඉවත් කර ඇති බවයි වාර්තා වන්නේ.
විචාරකයන් පවසන්නේ මෙමඟින් ආබාධිත පුද්ගලයන්ගේ නිදහස සහ රැකියාවක නිරත වීමේ හැකියාව සීමා වන බවයි. කෙසේ වෙතත් Motability ආයතනය පවසන්නේ මෙය “මිල ගණන් පාලනය කර ගැනීමට සහ රියදුරන්ගේ ආරක්ෂාව තහවුරු කිරීමට” ගත් පියවරක් බවයි.
නෙට්ෆ්ලික්ස් (Netflix) හි සුප්රසිද්ධ ‘Sex Education’ කතා මාලාවේ රඟපෑ 25 හැවිරිදි නළු කෙරොන් ඩේ (Keron Day) ද මේ පිළිබඳව සිය අප්රසාදය පළ කර තිබේ. ඔහු පවසන්නේ තමන් අනෙක් සෑම රියදුරෙකු මෙන් සාමාන්ය රියදුරු පරීක්ෂණයකින් සමත්ව ඇති බැවින්, මෙවැනි නිරීක්ෂණ උපකරණ අනිවාර්ය කිරීමෙන් ආබාධිත නොවන පිරිස්වලට වඩා තමන්ව වෙනස් කොට සැලකීමකට ලක්වන බවයි.
