මැදපෙරදිග කලාපයේ පවතින දැඩි උණුසුම්කාරී තත්ත්වය හමුවේ ඉරානයේ හමුදා ක්රියාමාර්ගවලට එරෙහිව අමෙරිකා එක්සත් ජනපදය සහ කලාපීය හවුල්කරුවන් සමඟ එක්ව කටයුතු කිරීමට බ්රිතාන්යය, ප්රංශය සහ ජර්මනිය තීරණය කර තිබේ.
බ්රිතාන්ය අග්රාමාත්ය කියර් ස්ටාර්මර්, ප්රංශ ජනාධිපති එමානුවෙල් මැක්රොන් සහ ජර්මානු චාන්සලර් ෆ්රෙඩ්රික් මර්ස් විසින් නිකුත් කරන ලද නිවේදනය මගින් ඉරානය විසින් එල්ල කරනු ලබන ප්රහාර “නොසිරුහුණු” ක්රියාවන් ලෙස හෙළා දැක ඇත. මෙම ප්රහාර තම රටවල පුරවැසියන්ට සහ කලාපයේ ස්ථානගත කර ඇති හමුදා නිලධාරීන්ට සෘජු තර්ජනයක් බව ඔවුහු පෙන්වා දෙති.
තම රටවල අවශ්යතා සහ මිත්ර පාර්ශ්වයන් ආරක්ෂා කර ගැනීම වෙනුවෙන් අවශ්ය ඕනෑම පියවරක් ගැනීමට සූදානම් බව මෙම නායකයෝ අවධාරණය කරති. විශේෂයෙන්ම ඉරානය සතු මිසයිල සහ ඩ්රෝන ප්රහාර එල්ල කිරීමේ හැකියාව අඩපණ කිරීම සඳහා එම ප්රහාර එල්ල වන මධ්යස්ථාන ඉලක්ක කර ප්රහාර එල්ල කිරීමට ද ඔවුන්ගේ අවධානය යොමු වී තිබේ.
සයිප්රසයේ පිහිටි බ්රිතාන්ය ගුවන් හමුදා කඳවුරකට සහ ප්රංශ නාවික කඳවුරක ගබඩාවකට ඉරාන ඩ්රෝන ප්රහාර එල්ල වූ බවට වාර්තා වීමෙන් අනතුරුව මෙම තීරණය ගෙන ඇත. මේ අතර කටාර්, සෞදි අරාබිය, එක්සත් අරාබි එමීර් රාජ්යය ඇතුළු ගල්ෆ් කලාපයේ රටවල් ද හදිසි සාකච්ඡාවක් පවත්වා ඉරාන ප්රහාර හෙළා දැක තිබේ.
