ජිනීවා නුවර පැවැත්වෙන එක්සත් ජාතීන්ගේ මානව හිමිකම් කවුන්සිලයේ (UNHRC) 61 වන සැසියේදී, බලුකිස්ථානයේ සිදුවන බරපතල මානව හිමිකම් උල්ලංඝනය කිරීම් සම්බන්ධයෙන් ජපාන මානව හිමිකම් ක්රියාකාරිකයෙකු වන ෂුන් ෆුජිකි (Shun Fujiki) විසින් පාකිස්ථානය දැඩි ලෙස විවේචනය කර තිබේ. 2025 වසර තුළ පමණක් බලුකිස්ථානයෙන් බලහත්කාරයෙන් අතුරුදන් කිරීම් 1,200කට අධික සංඛ්යාවක් වාර්තා වී ඇති බව ඔහු මෙහිදී අනාවරණය කළේය.
මෙම අතුරුදන් වූවන් අතර කාන්තාවන් සහ සිසුන් 75 දෙනෙකු ද වන බවත්, 1,000කට අධික පිරිසක් තවමත් අතුරුදන්ව සිටින බවත් වාර්තා වේ. වධහිංසා පැමිණවීම්, අධිකරණ නොවන ඝාතන සහ නීතිවිරෝධී ලෙස රඳවා තබා ගැනීම් අඛණ්ඩව සිදුවන බවට ඔහු චෝදනා කළේය. විශේෂයෙන්ම සාමකාමී විරෝධතාවක නිරත වීම හේතුවෙන් වසරකට වැඩි කාලයක් රඳවා තබාගෙන සිටින ක්රියාකාරිනී වෛද්ය මහ්රැන්ග් බලූච් (Dr Mahrang Baloch) නිදහස් කරන ලෙස ද ඔහු බලධාරීන්ගෙන් ඉල්ලා සිටියේය.
බලහත්කාරයෙන් අතුරුදන් කිරීම් සම්බන්ධ ජාත්යන්තර සම්මුතීන් අපරානුමත කරන ලෙසත්, බලුකිස්ථානයේ ස්වාභාවික සම්පත් අවභාවිතය වහාම නතර කරන ලෙසත් හෙතෙම පාකිස්ථානයට බල කර සිටියේය. බලුකිස්ථානයේ තඹ සහ රන් සංචිත බාහිර පාර්ශ්වයන් විසින් ප්රයෝජනයට ගනිද්දී, දේශීය ප්රජාව අන්ත දිළිඳුකමින් පීඩා විඳින බව ද ඔහු වැඩිදුරටත් පෙන්වා දුන්නේය.
