දකුණු චීන මුහුදේ පවතින දේශපාලන නොසන්සුන්තා මධ්යයේ ඇමරිකාව සහ ඕස්ට්රේලියාව පිලිපීනය සමඟ එක්ව මේ වසරේ සිය දෙවන ඒකාබද්ධ නාවික අභ්යාසය පවත්වා තිබේ. අප්රේල් 09 සිට 12 දක්වා දින හතරක් පුරා පැවැත්වූ මෙම යුද අභ්යාසය සඳහා යුද නැව් ප්රහාරක ජෙට් යානා සහ නිරීක්ෂණ ගුවන් යානා රැසක් සහභාගී වූ බව පිලිපීන හමුදාව අද (13) නිවේදනය කළේය. කලාපීය ආරක්ෂාව සහ රටවල් තුන අතර පවතින ආරක්ෂක සහයෝගීතාව ශක්තිමත් කිරීම මෙම අභ්යාසයේ ප්රධාන අරමුණ වී තිබේ.
මෙම අභ්යාසය සඳහා පිලිපීනය සිය FA-50 ප්රහාරක යානා ද ඕස්ට්රේලියාව P-8A Poseidon යානා ද ඇමරිකාව USS Ashland නෞකාව ද යොදවා තිබුණි. මෙම මෙහෙයුම අප්රේල් 20 වනදා ආරම්භ වීමට නියමිත “බලිකාටන්” (Balikatan) වාර්ෂික මහා පරිමාණ යුද අභ්යාසයට පෙරහුරුවක් ලෙස ද සැලකේ. මෙවර බලිකාටන් අභ්යාසය සඳහා පළමු වතාවට ජපානය ද පූර්ණ සාමාජිකයෙකු ලෙස එක් වීමට නියමිතය.
චීනය සහ පිලිපීනය අතර දකුණු චීන මුහුදේ අයිතිය සම්බන්ධයෙන් නිරන්තරයෙන් ගැටුම් පවතින අතර මෑතකදී චීනය විසින් පිලිපීන වෙරළාරක්ෂක යානයකට එරෙහිව ගිනි නිවන උපාංග (Flares) භාවිත කිරීමේ සිද්ධියක් ද වාර්තා විය. කෙසේ වෙතත් බීජිං පාලනය දිගින් දිගටම පවසා සිටින්නේ මෙවැනි ඒකාබද්ධ යුද අභ්යාස මගින් කලාපයේ පවතින නොසන්සුන්කාරී තත්ත්වය තවදුරටත් වර්ධනය වන බවයි.
