ඇමරිකානු කොංග්රස් පර්යේෂණ සේවය (Congressional Research Service) විසින් ඉකුත් මාර්තු 25 වනදා නිකුත් කරන ලද සවිස්තරාත්මක වාර්තාවක් මගින් පාකිස්ථානය පදනම් කරගෙන ඉන්දියාව සහ ජම්මු-කාශ්මීර කලාපය ඉලක්ක කරගනිමින් ක්රියාත්මක වන ප්රබල ත්රස්තවාදී කණ්ඩායම් කිහිපයක් නම් කර තිබේ. මෙම වාර්තාව මගින් අදාළ සංවිධානවල ශක්තිය, ක්රියාකාරී ප්රදේශ සහ ඔවුන්ගේ අරමුණු පැහැදිලි කර ඇති අතර, ඇමරිකානු නීතියට අනුව මෙම බොහෝ කණ්ඩායම් දැනටමත් විදේශීය ත්රස්තවාදී සංවිධාන ලෙස නම් කර ඇති බව ද පෙන්වා දෙයි.
මෙහිදී විශේෂයෙන්ම 80 දශකයේ අගභාගයේදී හෆීස් සයීඩ් (Hafiz Saeed) විසින් පිහිටුවන ලද ‘ලෂ්කාර්-ඊ-තොයිබා’ (Lashkar-e-Taiba) සංවිධානය දරුණුතම කණ්ඩායමක් ලෙස හඳුන්වා දී ඇත. පන්ජාබ් ප්රාන්තය සහ පාකිස්ථානය විසින් අත්පත් කරගෙන සිටින කාශ්මීර ප්රදේශය කේන්ද්ර කරගත් මෙම කණ්ඩායමට දහස් ගණනක සටන්කාමීන් පිරිසක් සිටින බවත්, ඔවුන් 2008 මුම්බායි ප්රහාරයට සෘජුවම වගකිව යුතු බවත් වාර්තාවේ සඳහන් වේ. මීට අමතරව, 2000 වසරේදී මසූඩ් අසාර් (Masood Azhar) විසින් ආරම්භ කරන ලද ‘ජයිෂ්-ඊ-මොහොමඩ්’ (Jaish-e-Mohammed) සංවිධානය ද ඉන්දියාවට එරෙහිව සන්නද්ධ මෙහෙයුම් දියත් කරන බවත්, ඔවුන්ගේ අරමුණ ඉන්දියාව සතු කාශ්මීරය පාකිස්ථානයට ඈඳා ගැනීම බවත් පෙන්වා දී තිබේ. ඉන්දියානු ආරක්ෂක අංශ පවසන්නේ මෙම කණ්ඩායම්වල සැබෑ ශක්තිය ඇමරිකානු වාර්තාවේ සඳහන් ප්රමාණයට වඩා බෙහෙවින් වැඩි බවයි.
