ඉරානය සමඟ පවතින යුද්ධයේ ඉදිරි දින කිහිපය තීරණාත්මක වනු ඇති බවත්, ඉරානය සිය අරමුණු අත්හරින තෙක් අමෙරිකාව “බෝම්බ මගින් සාකච්ඡා කිරීමට” (Negotiate with bombs) සූදානම් බවත් අමෙරිකානු ආරක්ෂක ලේකම් පීට් හෙග්සෙත් ප්රකාශ කර තිබේ. වෝල් ස්ට්රීට් ජර්නල් (WSJ) වාර්තාවකට අනුව ඔහු මේ බව පවසා ඇත්තේ ඊයේ (අඟහරුවාදා) පැවැති මාධ්ය හමුවකදීය.
පෙන්ටගනයේ මූලික ඉලක්කය වන්නේ ඉරානයේ මිසයිල පද්ධති, ඩ්රෝන යානා සහ නාවික හමුදාව සම්පූර්ණයෙන්ම විනාශ කිරීම බව ආරක්ෂක ලේකම්වරයා අවධාරණය කළේය. “ඉරානය මේ බව දන්නවා, එය වැළැක්වීමට ඔවුන්ට හමුදාමය වශයෙන් කළ හැකි දෙයක් නැති තරම්,” යනුවෙන් ඔහු වැඩිදුරටත් සඳහන් කර ඇත.
ඉරානය සහ අමෙරිකාව අතර පවතින ගැටුම අතිශය දරුණු මට්ටමකට පැමිණ ඇති පසුබිමක, අමෙරිකානු ආරක්ෂක අංශවලින් නිකුත් වූ මෙම ප්රකාශය කලාපීය යුද්ධය තවදුරටත් උත්සන්න කිරීමට හේතු වනු ඇතැයි විදේශ විශ්ලේෂකයෝ බිය පළ කරති. ඉරානයේ යුද ශක්තිය අඩපණ කිරීම සඳහා අඛණ්ඩව ප්රහාර එල්ල කරන බවට අමෙරිකාව මෙහිදී සෘජු අනතුරු ඇඟවීමක් කර තිබේ.
