ඇමරිකාවේ මැසචුසෙට්ස් ප්රාන්තයේ පදිංචි ඇලෙක්ස් ග්රොසොමනයිඩ්ස් පසුගිය වසරේදී ප්රංශයෙන් ශීත සෘතු කබායක් (Down jacket) ඇණවුම් කළේ එය ඉතා වාසිදායක ගනුදෙනුවක් වනු ඇතැයි සිතමිනි. නමුත් එම කබාය සඳහා ඔහුට ඇමරිකානු ඩොලර් 400කට (පවුම් 298) අධික තීරුබදු සහ සැකසුම් ගාස්තු ගෙවීමට සිදු වූ අතර, එය ඔහු මිලදී ගත් කබායේ වටිනාකමට බොහෝ දුරට සමාන විය. මෙම අධික බදු මුදලට හේතු වූයේ එම කබාය මියන්මාරයේ නිෂ්පාදනය කර තිබීම සහ එවකට ඇමරිකානු රජය මියන්මාර නිෂ්පාදන සඳහා පනවා තිබූ 40%ක දැඩි තීරුබදු ප්රතිපත්තියයි.
කෙසේ වෙතත්, ඇමරිකානු ජනාධිපති ඩොනල්ඩ් ට්රම්ප් විසින් පසුගිය වසරේ පනවන ලද මෙම තීරුබදු ඇතුළු තවත් බදු වර්ග කිහිපයක් නීතිවිරෝධී බවට එරට ශ්රේෂ්ඨාධිකරණය මෑතකදී තීන්දු කළේය. මේ සමඟ ඇමරිකානු ඉතිහාසයේ විශාලතම මුදල් ආපසු ගෙවීමේ වැඩසටහන ආරම්භ වීමට නියමිතව ඇති අතර, රජය විසින් අය කරගත් ඩොලර් බිලියන 160කට අධික මුදලක් ආනයනකරුවන් 330,000කට පමණ නැවත ලබා දීමට ජාත්යන්තර වෙළඳ අධිකරණය නියෝග කර තිබේ.
මෙතරම් විශාල මුදලක් ආපසු ගෙවීමට නියමිතව තිබුණද, ඇලෙක්ස් වැනි සාමාන්ය පාරිභෝගිකයන්ට එම මුදල ලැබේද යන්න පිළිබඳව බරපතළ සැකයක් පවතී. මන්දයත්, මෙම අධිකරණ තීන්දුව සෘජුවම අදාළ වන්නේ රජයට බදු ගෙවූ ආනයනකරුවන්ට පමණක් වන අතර, භාණ්ඩ ප්රවාහන ආයතන (DHL වැනි) හරහා හෝ ඉහළ ගිය භාණ්ඩ මිල හරහා එම බදු බර දැරූ පාරිභෝගිකයන්ට මුදල් ආපසු ලබා දෙන ආකාරය පිළිබඳව මෙතෙක් පැහැදිලි ක්රමවේදයක් සකස් කර නොමැති බැවිනි. තමා ගෙවූ ඩොලර් 248ක බදු මුදල ආපසු ලැබිය යුතු බව ඇලෙක්ස් පවසන නමුත්, අදාළ ආයතනවලින් මෙතෙක් ඒ පිළිබඳව ප්රතිචාරයක් නොලැබීම හේතුවෙන් ඔහු ඒ පිළිබඳව වැඩි බලාපොරොත්තුවක් තබා නොමැති බව වාර්තා වේ.
