මැදපෙරදිග යුදමය වාතාවරණය හමුවේ ලෝක වෙළෙඳපොළේ ඉන්ධන මිල ශීඝ්රයෙන් ඉහළ යාම පාලනය කිරීම සඳහා අමෙරිකා එක්සත් ජනපදය ඉරාන තෙල් නිෂ්පාදන මත පනවා තිබූ ඇතැම් සම්බාධක ඉවත් කිරීමට තීරණය කර තිබේ. අමෙරිකානු භාණ්ඩාගාර ලේකම් ස්කොට් බෙස්න්ට් (Scott Bessent) ප්රකාශ කර ඇත්තේ දැනට මුහුදේ නෞකා මත සිරවී ඇති ඉරාන තෙල් අලෙවි කිරීම සඳහා අප්රේල් 19 වැනිදා දක්වා වලංගු වන සීමිත බලපත්රයක් නිකුත් කළ බවයි.
මෙම පියවර හරහා තෙල් බැරල් මිලියන 140ක් පමණ කඩිනමින් ලෝක වෙළෙඳපොළට එක් වනු ඇතැයි අපේක්ෂා කරන අතර විශේෂයෙන්ම ඉන්දියාව, ජපානය සහ මැලේසියාව වැනි තෙල් අවශ්යතාවයෙන් පෙළෙන රටවලට මෙම සැපයුම් ලබා ගැනීමට අවස්ථාව හිමි වනු ඇත. මීට පෙර සම්බාධක හේතුවෙන් චීනය විසින් විශාල වට්ටම් සහිතව ලබාගත් ඉරාන තෙල් සඳහා මෙතැන් සිට සාමාන්ය වෙළෙඳපොළ මිල ගෙවීමට ඔවුන්ට සිදු වනු ඇති බව භාණ්ඩාගාර ලේකම්වරයා වැඩිදුරටත් පෙන්වා දෙයි.
මෙම තීරණය අමෙරිකානු විදේශ ප්රතිපත්තියේ පසුබෑමක් ලෙස ඇතැම් විශේෂඥයන් හඳුන්වන අතර මෙලෙස තෙල් අලෙවියෙන් ඉරානයට ලැබෙන මුදල් ඔවුන්ගේ යුද කටයුතු සඳහා යොදාගැනීමේ අවදානමක් පවතින බවට ද විවේචන එල්ල වේ. ජනාධිපති ඩොනල්ඩ් ට්රම්ප් මේ පිළිබඳව අදහස් දක්වමින් පවසා ඇත්තේ මිල පාලනය කර ගැනීම වෙනුවෙන් අවශ්ය ඕනෑම පියවරක් ගැනීමට තම රජය සූදානම් බවයි. කෙසේ වෙතත් මෙම තාවකාලික සහනය ලෝක ඉන්ධන මිල කෙරෙහි කෙතරම් දුරට බලපෑමක් කරනු ඇත්ද යන්න පිළිබඳව ආර්ථික විශ්ලේෂකයෝ තවමත් අවිශ්වාසය පළ කරති.
