ඉරානය සහ ඇමරිකා එක්සත් ජනපදය අතර පවතින යුදමය වාතාවරණය හමුවේ ජීවිතක්ෂයට පත්වූ හත්වන ඇමරිකානු සෙබළා ලෙස 26 හැවිරිදි බෙන්ජමින් එන්. පෙනින්ග්ටන් (Benjamin N. Pennington) නමැති සැරයන්වරයා පෙන්ටගනය විසින් නිල වශයෙන් හඳුනාගෙන තිබේ. කෙන්ටකි ප්රාන්තයේ පදිංචිකරුවෙකු වන ඔහු, පසුගිය මාර්තු 01 වනදා සෞදි අරාබියේ පිහිටි පීටර් සුල්තාන් ගුවන් කඳවුරට ඉරානය එල්ල කළ ප්රහාරයකින් බරපතළ තුවාල ලබා ප්රතිකාර ලබමින් සිටියදී ඊයේ (මාර්තු 08) මියගොස් ඇත.
පෙනින්ග්ටන් මහතා ඇමරිකානු යුද හමුදාවේ අභ්යවකාශ සහ මිසයිල ආරක්ෂක අංශයට (Space and Missile Defense Command) අනුයුක්තව සේවය කළ දක්ෂ නිලධාරියෙකු වන අතර, ඔහුගේ සේවය අගයමින් මරණින් පසුව ඔහුව මාණ්ඩලික සැරයන් (Staff Sergeant) නිලයට උසස් කිරීමට ද තීරණය කර තිබේ. ඇමරිකානු උප ජනාධිපති ජේ.ඩී. වෑන්ස් මහතා ද වොෂින්ටන් නුවර පැවති උත්සවයකදී මෙම මරණය පිළිබඳව සිය කනගාටුව පළ කරමින් මියගිය සෙබළුන් වෙනුවෙන් ප්රාර්ථනා කරන ලෙස ජනතාවගෙන් ඉල්ලා සිටියේය.
පසුගිය සෙනසුරාදා සිට ඇමරිකාව සහ ඉශ්රායලය එක්ව ඉරානයට එරෙහිව ආරම්භ කළ යුද මෙහෙයුම් හමුවේ ඇමරිකානු සෙබළුන් හත්දෙනෙකු මේ වන විට ජීවිතක්ෂයට පත්ව ඇත. මීට පෙර කුවේට්හි පෝට් ෂුයිබා ප්රදේශයට එල්ල වූ ප්රහාරයකින් ඇමරිකානු සෙබළුන් හයදෙනෙකු මියගිය අතර ඔවුන් ද පසුගිය සතියේ හඳුනා ගැනුණි. පවතින තත්ත්වය හමුවේ ඉරානය විසින් බහරේනය සහ එක්සත් අරාබි එමීර් රාජ්යයේ පිහිටි ඇමරිකානු ඉලක්ක වෙත ද මිසයිල ප්රහාර එල්ල කරමින් පවතින බව වාර්තා වේ.
