ඉරානයට එරෙහිව ක්රියාත්මක වන ‘ඔපරේෂන් එපික් ෆියුරි’ (Operation Epic Fury) මෙහෙයුම අතරතුර එල්ල වූ ඉරාන ඩ්රෝන ප්රහාරයකින් ජීවිතක්ෂයට පත් වූ ඇමෙරිකානු සෙබළියකගේ තොරතුරු පෙන්ටගනය විසින් නිල වශයෙන් අනාවරණය කර තිබේ. ඇය 39 හැවිරිදි සාජන් මේජර් (Sgt. 1st Class) නිකොල් අමෝර් වන අතර, මින්සෝටා ප්රාන්තයේ පදිංචිකාරියකි. කුසයිට්හි ෂුඅයිබා (Port Shuaiba) වරාය පරිශ්රයේදී පසුගිය ඉරිදා එල්ල වූ මෙම ප්රහාරයෙන් ඇය සමඟ තවත් ඇමෙරිකානු සෙබළුන් තිදෙනෙකු ජීවිතක්ෂයට පත්ව ඇත.
2005 වසරේදී ජාතික ආරක්ෂක බලකායට එක් වූ නිකොල් අමෝර්, 2006 වසරේදී ඇමෙරිකානු යුද හමුදා රක්ෂිත බලකාය වෙත මාරු වී තිබේ. 2019 වසරේදී කුවේට් සහ ඉරාකයේ සේවය කර ඇති ඇය, මෙවර මිය යන විට අයෝවා ප්රාන්තය පදනම් කරගත් 103 වැනි සැපයුම් අණදෙන මූලස්ථානයට (103rd Sustainment Command) අනුයුක්තව සේවය කරමින් සිටියාය. නිකොල් සමඟ මියගිය අනෙක් සෙබළුන් වන්නේ කැප්ටන් කෝඩි කොර්ක් (35), සාජන් නෝවා ටීට්ජන්ස් (42) සහ සාජන් ඩෙක්ලාන් කෝඩි (20) යන අයයි.
නිකොල්ගේ වියෝව සම්බන්ධයෙන් ඇයගේ ස්වාමිපුරුෂයා වන ජෝසෆ් පවසන්නේ, සිය බිරිඳ මෙහෙයුම නිමවා නැවත නිවසට පැමිණීමට දින කිහිපයක් පමණක් ඉතිරිව තිබූ බවයි. දරුවන් දෙදෙනෙකුගේ මවක වන නිකොල්, සිය අවසන් දුරකථන සංවාදයේදී පවසා ඇත්තේ තමා ඉතා ඉක්මනින් නිවසට පැමිණෙන බවයි. මෙම ඛේදවාචකය පිළිබඳව ඇමෙරිකානු ආරක්ෂක අංශ මේ වන විට විශේෂ පරීක්ෂණයක් ආරම්භ කර ඇති අතර, මෙම ප්රහාරය හේතුවෙන් ඉරානයට එරෙහි ඇමෙරිකානු ප්රහාර තවදුරටත් දැඩි වනු ඇති බවට දේශපාලන විචාරකයෝ මත පළ කරති
