මැදපෙරදිග කලාපය පුරා ශීඝ්රයෙන් ව්යාප්ත වන යුදමය වාතාවරණය සහ පවතින දැඩි අවුල් සහගත තත්ත්වය හේතුවෙන්, එම කලාපයේ රටවල් දහයකට වැඩි සංඛ්යාවක රැඳී සිටින සියලුම අමෙරිකානු පුරවැසියන්ට වහාම ඉන් ඉවත් වන ලෙස අමෙරිකානු රාජ්ය දෙපාර්තමේන්තුව අද (මාර්තු 03) නිවේදනය කළේය. පවතින බරපතල ආරක්ෂක අවදානම සැලකිල්ලට ගනිමින් මෙම හදිසි පියවර ගෙන ඇති අතර, කලාපය තුළ පවතින ගැටුම්කාරී තත්ත්වය පාලනය කළ නොහැකි මට්ටමකට වර්ධනය වී ඇති බවට අමෙරිකානු බලධාරීහු අනතුරු අඟවති.
කොන්සියුලර් කටයුතු පිළිබඳ අමෙරිකානු සහකාර රාජ්ය ලේකම් මෝරා නම්දාර් (Mora Namdar) සිය ‘X’ සමාජ මාධ්ය ගිණුම හරහා විශේෂ නිවේදනයක් නිකුත් කරමින් අවධාරණය කළේ, ඉරානය, ඉරාකය, ජෝර්දානය, ලෙබනනය සහ ඊශ්රායලය ඇතුළු රටවල සිටින අමෙරිකානුවන් පවතින ඕනෑම වාණිජ ප්රවාහන සේවාවක් භාවිත කරමින් “දැන්ම පිටව යා යුතු” (DEPART NOW) බවයි. පසුගිය සෙනසුරාදා අමෙරිකාව සහ ඊශ්රායලය එක්ව ඉරානයට එල්ල කළ ප්රහාරයෙන් ආරම්භ වූ මෙම යුදමය තත්ත්වය, මේ වන විට අසල්වැසි බොහෝ රටවලට බලපාන පුළුල් කලාපීය ගැටුමක් දක්වා වර්ධනය වී තිබේ.
කලාපය තුළ පවතින යුදමය වාතාවරණය හේතුවෙන් බොහෝ ප්රධාන ගුවන් සමාගම් මේ වන විටත් මැදපෙරදිග වෙත සහ ඉන් පිටතට සිදුකරන ගුවන් ගමන් වාර අවලංගු කර ඇත. මෙම තත්ත්වය හමුවේ අමෙරිකානු වැසියන්ට සිය ආරක්ෂාව තහවුරු කර ගැනීම සඳහා පවතින ගුවන් ගමන් හෝ වෙනත් ප්රවාහන මාර්ග උපරිමයෙන් භාවිත කරන ලෙස රාජ්ය දෙපාර්තමේන්තුව වැඩිදුරටත් උපදෙස් දී තිබේ. මෙම ගැටුම් හේතුවෙන් සමස්ත කලාපයේම සිවිල් ජන ජීවිතයට සහ ජාත්යන්තර ගුවන් ගමනාගමනයට එල්ල වී ඇත්තේ දැඩි බලපෑමකි.
