කෘත්රිම බුද්ධියෙන් ක්රියාත්මක වන රියදුරු රහිත රථ (Self-driving vehicles) සම්බන්ධයෙන් ලොව පුරා පවතින විශ්වාසය දැඩි ලෙස පළුදු කරමින්, පසුගිය ඉරිදා අලුයම ටෙක්සාස් ප්රාන්තයේ ඔස්ටින් (Austin) නගරයේ සිදුවූ සමූහ වෙඩි තැබීමකදී ගිලන් රථයක ගමනට බාධා කිරීමට ‘Waymo’ රොබෝ කුලී රථයක් කටයුතු කර තිබේ. මෙම අනපේක්ෂිත බාධාව හේතුවෙන් තීරණාත්මක මොහොතකදී වටිනා කාලය අපතේ ගිය අතර, තාක්ෂණය මිනිස් ජීවිතවලට වඩා ඉහළින් තැබීමේ බරපතල අවදානම මෙයින් යළිත් කරළියට පැමිණ ඇත.
සිද්ධිය වාර්තා වන අන්දමට, ඔස්ටින් නගරයේ ජනාකීර්ණ බාර් එකක් අසලදී තුවක්කුකරුවෙකු එල්ල කළ ප්රහාරයෙන් පුද්ගලයන් දෙදෙනෙකු මියගොස් තවත් 14 දෙනෙකු තුවාල ලබා තිබේ. තුවාල ලැබූවන් රෝහල් ගත කිරීමට පැමිණි ගිලන් රථයකට මාවත විවර කර දෙනවා වෙනුවට, අදාළ රියදුරු රහිත රථය පාරට ලම්බකව නැවතී මංතීරු දෙකම සම්පූර්ණයෙන්ම අවහිර කර ඇත. මෙම රථ පාලනය කෙරෙන පරිගණක පද්ධතිය එවැනි හදිසි අවස්ථාවකදී “හිරවීම” (Freeze) නිසා ගිලන් රථයට ඉදිරියට යාමට නොහැකිව කොටු වී තිබේ.
මෙම රියදුරු රහිත රථවල පවතින ප්රධානතම ගැටලුව වන්නේ හදිසි අවස්ථාවකදී ඒවායේ පාලනය අතට ගැනීමට මිනිස් රියදුරෙකු නොමැති වීමයි. Waymo සමාගම පවසන පරිදි මෙම රථ පාලනය කෙරෙන්නේ කැමරා සහ සංවේදක පද්ධතියක් හරහා වන අතර, යම් ගැටලුවකදී සහාය වීමට සිටින කාර්ය මණ්ඩලය විදේශීය රටවල පදිංචිකරුවන් වීම සහන සේවා කටයුතු තවදුරටත් සංකීර්ණ කරයි. මෙම සිද්ධියත් සමඟ රොබෝ රථ සේවා සඳහා පනවා ඇති නීති රීති දැඩි කළ යුතු බවට අමෙරිකාව තුළ දැඩි විරෝධයක් මතුවෙමින් පවතින අතර, මහජන ආරක්ෂාවට තර්ජනයක් වන මෙවැනි තාක්ෂණික දෝෂ පිළිබඳව Waymo සමාගම වගකිව යුතු බව බලධාරීහු පවසති.
