අධික වැසි සමඟ හටගත් ජල ගැලීම්වලින් විපතට පත්වූවන්ට සහන සැලසීම පිළිබඳව සොයා බැලීමට ජනාධිපති ගෝඨාභය රාජපක්ෂ මහතා අද (23) අනුරාධපුරයේ සහ පොළොන්නරුවේ ස්ථාන කිහියක නිරීක්ෂණ චාරිකාවක නිරතවිය.
ජනාධිපති මාධ්‍ය අංශ්‍ය පැවසුවේ අනුරාධපුර ජනාධිපති මන්දිරයේ දී දේශපාලන බලධාරීන් සහ රාජ්‍ය නිලධාරින් හමු වු ජනාධිපතිතුමා සහන වැඩපිළිවෙළ විමර්ශනය කළ බවයි.
අවතැන්වූවන් වෙනුවෙන් ක්‍රියාත්මක සුබසාධන වැඩපිළිවෙළ කඩිනම්ව හා අඛණ්ඩව ඉදිරියට ක්‍රියාත්මක කිරීමට ජනාධිපතිවරයා මෙහිදී නිලධාරින්ට උපදෙස් දී තිබේ.
අනුරාධපුර දිස්ත්‍රික්කයේ ප්‍රාදේශීය ලේකම් කොට්ඨාස 22 න් 10කට ආපදා තත්ත්වය බලපා ඇති අතර දෙසැම්බර් 20වනදා සිට අද දක්වා පවුල් 1561ක සාමාජිකයෝ 5181 දෙනෙක් විපතට පත්ව සිටිති. ඉන් පවුල් 937ක සාමාජිකයන් 2923 දෙනෙකු ආරක්ෂිත ස්ථානවලට යොමු කර තිබේ. ඔවුනට පිසූ ආහාර මෙන්ම, වියළි ආහාර ද සපයනු ලැබේ.
නිවාසවලට සිදුව ඇති හානි පිළිබඳ සොයා බලා වහා ක්‍රියාකිරිමට ජනාධිපතිවරයා මෙහිදී අදාළ නිලධාරින්ට උපදෙස් දී තිබේ. ආපදා තත්ත්වය පහව ගොස් ඇති ප්‍රදේශවල නිවාස පිරිසිදු කිරීම දැනටමත් ආරම්භ කර ඇති බව ජනාධිපති මාධ්‍ය අංශය වැඩිදුරටත් කියා සිටියෙය.
දිලිනි සමන්මලි
