කුවේට් රාජ්යයේ බලශක්ති සහ ජලය පිරිපහදු කිරීමේ මධ්යස්ථානයක් (Desalination Plant) ඉලක්ක කරගනිමින් ඉරානය එල්ල කළ ප්රහාරයකින් එහි සේවය කළ ඉන්දීය ජාතිකයෙකු මියගොස් ඇති බව එරට විදුලිබල හා ජල අමාත්යාංශය අද (30) තහවුරු කළේය. ඉරිදා සවස් කාලයේ එල්ල වූ මෙම ප්රහාරයෙන් බලාගාරයේ සේවා ගොඩනැගිල්ලකට සහ යටිතල පහසුකම් පද්ධතියට දැඩි දේපළ හානි සිදුව ඇති බව ද වාර්තා වේ.
පසුගිය පෙබරවාරි 28 වනදා ඊශ්රායලය සහ ඇමරිකාව එක්ව ඉරානයේ උත්තරීතර නායකයාව ඝාතනය කිරීමත් සමඟ ආරම්භ වූ මැදපෙරදිග මහා යුද්ධය මේ වන විට කලාපයේ සෙසු රටවල් වෙත ද ව්යාප්ත වී තිබේ. කුවේට් රජය මෙම ප්රහාරය සිය රටට එරෙහිව එල්ල වූ “ඉරාන ආක්රමණයක්” (Iranian Aggression) ලෙස හඳුන්වා දී ඇති අතර, මියගිය ඉන්දීය සේවකයා පිළිබඳව ඉන්දීය විදේශ අමාත්යාංශය සහ කුවේට් බලධාරීන් අතර සම්බන්ධීකරණ කටයුතු මේ වන විට සිදුවෙමින් පවතී.
මෙම ප්රහාරයත් සමඟ කලාපයේ තෙල් සහ ජල සැපයුම් පද්ධතීන් අනතුරට ලක්ව ඇති අතර, ගෝලීය වෙළෙඳපොළේ ඉන්ධන මිල ශීඝ්රයෙන් ඉහළ යාමේ අවදානමක් ද මතු වී තිබේ. කුවේට් ආරක්ෂක අංශ විසින් ප්රදේශයේ ආරක්ෂාව දැඩි කර ඇති අතර, තවදුරටත් එල්ල විය හැකි ප්රහාර පිළිබඳව දැඩි අවධානයෙන් පසුවන ලෙස ජනතාවට දැනුම් දී ඇත.
