Elon Musk ට අයත් SpaceX සමාගමේ ‘Starlink’ අන්තර්ජාල සේවාවට අයත් චන්ද්රිකාවක් මාස තුනක් ඇතුළත දෙවන වරටත් තාක්ෂණික දෝෂයකට ලක්ව පෘථිවියට ඉහළින් කක්ෂයේදී බිඳී ගොස් ඇති බව අද (01) වාර්තා විය. මෙම සිදුවීමත් සමඟ චන්ද්රිකා මිලියනයක් දක්වා සිය ජාලය ව්යාප්ත කිරීමට සමාගම දරන උත්සාහය පිළිබඳව විද්යාඥයන් සහ පරිසරවේදීන් අතර දැඩි සංවාදයක් නිර්මාණය වී තිබේ.
පසුගිය මැයි මාසයේදී කැලිෆෝනියාවේ වැන්ඩන්බර්ග් අභ්යවකාශ බලකා කඳවුරෙන් (Vandenberg Space Force Base) දියත් කරන ලද ‘34343’ දරන Starlink චන්ද්රිකාව මෙලෙස අනතුරට ලක්ව ඇත. පෘථිවියේ සිට කිලෝමීටර් 560ක් පමණ උසින් පිහිටි කක්ෂයකදී මෙම චන්ද්රිකාව සමඟ පැවති සන්නිවේදනය විසන්ධි වූ බව SpaceX සමාගම ‘X’ පණිවිඩයක් මගින් තහවුරු කළේය. මෙය ‘V2 Mini’ වර්ගයේ චන්ද්රිකාවක් වන අතර එය කුඩා මෝටර් රථයක ප්රමාණයෙන් යුක්ත වන අතර රාත්තල් 1,760ක පමණ බරකින් යුක්ත වේ.
Starlink ජාලය මේ වන විට චන්ද්රිකා 10,000කට අධික ප්රමාණයක් ක්රියාත්මක කරන අතර, මෙලෙස චන්ද්රිකා බිඳී යාම නිසා අභ්යවකාශයේ සුන්බුන් (Space Debris) ප්රමාණය ඉහළ යාම ඉදිරි අභ්යවකාශ මෙහෙයුම්වලට මෙන්ම අනෙකුත් චන්ද්රිකාවලට ද විශාල තර්ජනයක් විය හැකි බව විද්වත්හු පෙන්වා දෙති. විශේෂයෙන්ම බස්ට්රොප් ප්රාන්තයේ (Bastrop County) සිය නිෂ්පාදන කටයුතු පුළුල් කරන SpaceX සමාගම, අභ්යවකාශයේ පවතින පාරිසරික සමතුලිතතාවය පිළිබඳව මීට වඩා අවධානය යොමු කළ යුතු බවට විවේචන එල්ල වෙමින් පවතී.
