ඉරාන ජනාධිපති මසූඩ් පෙසෙෂ්කියන් (Masoud Pezeshkian) අද (අප්රේල් 02) අමෙරිකානු ජනතාව වෙත සෘජු පණිවිඩයක් නිකුත් කරමින් ප්රකාශ කළේ ඉරානය කිසිවිටෙකත් යුද්ධයක් ආරම්භ කර නොමැති බවත්, අමෙරිකානු ජනතාව සමඟ කිසිදු සතුරුකමක් නොමැති බවත්ය. කලාපීය යුද්ධයකදී අමෙරිකාව ක්රියා කරන්නේ තමන්ගේම අවශ්යතා මතද නැතහොත් “ඊශ්රායලයේ අතකොළුවක්” (Proxy) ලෙසද යන්න ඔහු මෙහිදී ප්රශ්න කර සිටියේය.
තම රට විසින් මේ දක්වා ගෙන ඇති සියලුම ක්රියාමාර්ග ස්වයං ආරක්ෂාව වෙනුවෙන් ගත් සාධාරණ පියවර බවත්, දෙරට අතර පවතින උග්ර ආතතියට හේතුව 1953 කුමන්ත්රණය, පනවා ඇති සම්බාධක සහ මෑතකදී එල්ල වූ ප්රහාර බවත් ඔහු පෙන්වා දුන්නේය. ඉරාන න්යෂ්ටික ගිවිසුමෙන් ඉවත් වීමට ගත් තීරණය අමෙරිකානු රජයේ වගකීමක් බවත්, ඉරානය පිළිබඳව ලෝකය හමුවේ මවා ඇති බිහිසුණු ප්රතිරූපය “නිර්මාණය කරන ලද්දක්” (Manufactured) බවත් ජනාධිපතිවරයා වැඩිදුරටත් පැවසීය.
කෙසේ වෙතත්, ඉරාන පාලනය විසින් අමෙරිකානු ජනතාව වෙත මෙම සාමකාමී පණිවිඩය නිකුත් කරන අතරතුරදීම, එරට වීදි පුරා “අමෙරිකාවට මරණය” (Death to America) යනුවෙන් සුපුරුදු පරිදි හඬ නගන බව දේශපාලන විචාරකයෝ පෙන්වා දෙති. ඉරානය විසින් මෙම පණිවිඩය නිකුත් කරන්නේ අමෙරිකාව තුළ පවතින මහජන මතය වෙනස් කිරීමට දරන උපායමාර්ගික උත්සාහයක කොටසක් ලෙස බව ද සැලකේ.
