ජර්මනියේ බැල්ටික් මුහුදු වෙරළේ නොගැඹුරු දියේ සිරවී සිටින මීටර් 13.5ක් දිගැති හම්ප්බැක් තල්මසා බේරාගැනීම සඳහා දියත් කළ මෙහෙයුම් අත්හැර දැමීමට විශේෂඥ කණ්ඩායම් ඊයේ (01) තීරණය කළහ. පසුගිය සතිය පුරා ලුබෙක් (Lübeck) සහ විස්මාර් (Wismar) නගර ආසන්නයේ වැලිපරවල කිහිප වතාවක්ම සිරවූ මෙම සත්වයාගේ ජීවත්වීමේ අවස්ථාව ඉතා අවම මට්ටමක පවතින බව විද්යාඥයෝ පවසති.
පසුගිය මාර්තු 23 වනදා පළමු වරට මෙම තල්මසා වැලිපරයක සිරවී සිටියදී සොයාගැනීමත් සමඟ ගිනි නිවන භටයන්, විද්යාඥයන් සහ සමුද්ර පොලිසිය එක්ව දැවැන්ත බේරාගැනීමේ මෙහෙයුමක් ආරම්භ කරන ලදී. කිහිප වතාවක්ම වැලිපරවලින් මිදී යාමට තල්මසා සමත් වුවද, නැවත නැවතත් නොගැඹුරු දියේ සිරවීම හේතුවෙන් සත්වයා දැඩි ලෙස විඩාවට පත්ව සිටියි. ජර්මානු ජනතාවගේ දැඩි අවධානයට ලක්වූ මෙම සත්වයා නැවත අත්ලාන්තික් සාගරයේ පිහිටි සිය ස්වාභාවික වාසස්ථානය වෙත ගමන් කරනු ඇතැයි බලධාරීන් මුලින් බලාපොරොත්තු වූහ.
කෙසේ වෙතත්, සත්වයාගේ දුර්වල සෞඛ්ය තත්ත්වය සහ පවතින භූගෝලීය බාධක හේතුවෙන් බේරාගැනීමේ මෙහෙයුම් තවදුරටත් ඉදිරියට ගෙන යාම ඵලක් නොවන බව තීරණය කෙරුණි. තල්මසාගේ ස්වාභාවික මරණය සිදුවන තෙක් බලා සිටීමට හෝ පවතින තත්ත්වය නිරීක්ෂණය කිරීමට දැන් විශේෂඥයෝ කටයුතු කරති.
