යේල් විශ්වවිද්යාලයේ සහාය මහාචාර්යවරයෙකු ලෙස සේවය කළ ලොව පිළිගත් විද්යාඥයෙකු වන ක්ෂෑන් කායි, ඇමෙරිකාව තුළ චීන ජාතික විද්යාඥයෙකුට හිමිවන සීමිත අවස්ථා සහ පවතින වර්ණ භේදවාදී බාධක (Racial Ceiling) හේතුවෙන් සිය තනතුරෙන් ඉල්ලා අස්වී නැවත චීනය බලා ගොස් තිබේ. සෛලීය ව්යුහයන් පිළිබඳ අති නවීන පර්යේෂණ මෙහෙයවන ඔහු, පසුගිය ජනවාරි 12 වනදා චීනයේ විද්යා හා තාක්ෂණ විශ්වවිද්යාලයට (USTC) නිල වශයෙන් එක් විය.
ක්ෂෑන් කායි පවසන පරිදි, ඇමෙරිකාව තුළ චීන ජාතික විද්වතෙකුට මෙතරම් දැවැන්ත හා මූලෝපායික වැදගත්කමකින් යුත් ව්යාපෘතියක නායකත්වය දැරීම “නොකළ හැක්කක්” (Almost impossible) වැනි කරුණකි. සෛලයක “බලශක්ති මධ්යස්ථානය” ලෙස හැඳින්වෙන මයිටොකොන්ඩ්රියා (Mitochondria) වල පරමාණුක ව්යුහය සජීවීව නිරීක්ෂණය කළ හැකි නවීන තාක්ෂණයක් ඔහු විසින් නිපදවා ඇති අතර, එය වෛද්ය විද්යාවේ දැවැන්ත පෙරළියක් ලෙස සැලකේ.
චීනයේ ශාන්සි (Shaanxi) ප්රාන්තයේ දුප්පත් ගොවි පවුලක උපන් ඔහු, පසුව ලොව සුප්රකට කේම්බ්රිජ් සහ යේල් වැනි විශ්වවිද්යාලවල සිය පර්යේෂණ සිදු කළේය. ඔහු චීනයට පැමිණ මාසයකට පසු, ලොව පිළිගත් ‘Nature’ සඟරාවේ ඔහුගේ නවතම පර්යේෂණ පත්රිකාව ද පළ විය. මෑත කාලීනව ඇමෙරිකාව සහ යුරෝපය අතහැර දක්ෂ චීන විද්යාඥයන් විශාල පිරිසක් නැවත සිය මව්බිම බලා යාමේ ප්රවණතාව මෙයින් තවදුරටත් තහවුරු වන බව විචාරකයෝ පෙන්වා දෙති.
