පසුගිය දින හතරක් පුරා අඛණ්ඩව ඉහළ ගිය ලෝක වෙළඳපොළේ රන් මිල බ්රහස්පතින්දා (02) දින සියයට 1 කට වඩා වැඩි ප්රතිශතයකින් යළි පහළ බැස තිබේ. ඉදිරි සති කිහිපය තුළත් ඉරානය සමඟ පවතින යුදමය තත්ත්වය අඛණ්ඩව පවත්වාගෙන යන බවට අමෙරිකානු ජනාධිපති ඩොනල්ඩ් ට්රම්ප් කළ ප්රකාශය මීට ප්රධානතම හේතුව වී ඇත.
ඒ අනුව ලෝක වෙළඳපොළේ රන් මිල (Spot Gold) සියයට 1.3 කින් පහළ වැටී රන් අවුන්සයක මිල ඇමෙරිකානු ඩොලර් 4,694.48 ක් දක්වා අඩු වූ අතර, අමෙරිකානු රන් අනාගත ගිවිසුම් මිල (Gold Futures) සියයට 1.9 කින් පහළ බැස ඩොලර් 4,723.70 ක් ලෙස සටහන් විය. මීට පෙර ට්රම්ප්ගේ ප්රකාශය නිකුත් වීමට ප්රථම රන් මිල සියයට 1 කට වඩා වැඩි අගයකින් ඉහළ ගොස් මාර්තු 19 වැනිදායින් පසු වාර්තා වූ ඉහළම මට්ටමට පැමිණ තිබුණි.
ජනාධිපති ට්රම්ප් ජාතිය අමතා කළ රූපවාහිනී ප්රකාශයකදී සඳහන් කළේ ඉදිරි සති දෙක තුන ඇතුළත ඉරානයට “අතිශය දැඩි” ප්රහාර එල්ල කරන බවත්, මැදපෙරදිග ගැටුම තුළ අමෙරිකාවේ උපායමාර්ගික ඉලක්ක සපුරා ගැනීමට ඉතා ආසන්නව පවතින බවත්ය. මෙම ප්රකාශයත් සමඟ බ්රෙන්ට් (Brent) බොරතෙල් මිල සියයට 4 කට වඩා වැඩි අගයකින් ඉහළ ගිය අතර, ඇමරිකානු ඩොලරයේ අගයද ශක්තිමත් වීම රන් මිල පහළ යාමට සෘජුවම බලපෑවේය.
