ප්රංශ ජනාධිපති එමානුවෙල් මැක්රොන් (Emmanuel Macron) මහතා සහ දකුණු කොරියානු ජනාධිපති ලී ජේ මියුන් (Lee Jae Myung) මහතා අතර අද (03) සෝල් නුවරදී පැවැති සාකච්ඡාවලින් පසු දෙරට අතර පවතින සබඳතා “ගෝලීය උපායමාර්ගික හවුල්කාරිත්වයක්” (Global Strategic Partnership) දක්වා ඉහළ නැංවීමට තීරණය කර තිබේ. 2015 වසරෙන් පසු ප්රංශ ජනාධිපතිවරයෙකු දකුණු කොරියාවේ සිදු කරන පළමු නිල සංචාරය මෙයයි.
මෙම සංචාරය ආර්ථික හා බලශක්ති සුරක්ෂිතතාව ඉලක්ක කර ගත්තක් වුවද, පවතින ඉරාන යුදමය වාතාවරණය සහ හෝමුස් සමුද්ර සන්ධිය අවහිර වීම හේතුවෙන් මතුව ඇති ගෝලීය බලශක්ති අර්බුදය පිළිබඳව මෙහිදී වැඩි අවධානයක් යොමු වී ඇත. දකුණු කොරියාව සිය බලශක්ති අවශ්යතා සඳහා හෝමුස් සමුද්ර සන්ධිය හරහා සිදුවන ආනයන මත බෙහෙවින් යැපෙන බැවින්, පවතින තත්ත්වය එරට ආර්ථිකයට දැඩි බලපෑමක් එල්ල කර තිබේ.
හෝමුස් සමුද්ර සන්ධියේ ආරක්ෂාව තහවුරු කිරීම සඳහා ප්රංශය මෙහෙයවන නාවික ආරක්ෂක වැඩපිළිවෙළකට දකුණු කොරියාවේ සහාය ලබා ගැනීමට ද මැක්රොන් ජනාධිපතිවරයා මෙහිදී උත්සාහ කර ඇත. කෙසේ වෙතත්, ඇමරිකානු ජනාධිපති ඩොනල්ඩ් ට්රම්ප් විසින් එම ජල මාර්ගය විවෘත කිරීමේ වගකීම අනෙකුත් රටවල් වෙත පවරා ඇති පසුබිමක, බලය භාවිතා කරමින් හෝමුස් සමුද්ර සන්ධිය විවෘත කිරීමට යුදමය මෙහෙයුමක් දියත් කිරීම ප්රායෝගික නොවන බව මැක්රොන් මහතා පෙන්වා දී තිබේ.
