නීත්යානුකූල නොවන ලෙස එකලස් කරන ලද සුඛෝපභෝගී මෝටර් රථ 20ක් සමඟ සැකකරුවන් තිදෙනෙකු අත්අඩංගුවට ගැනීමට බස්නාහිර පළාත් උතුර අපරාධ කොට්ඨාශය අද (අප්රේල් 04) සමත් වී තිබේ. කඩවත, ගම්පහ සහ ජාඇල ප්රදේශවල පදිංචි මෙම සැකකරුවන් අත්අඩංගුවට ගෙන ඇත්තේ එම කොට්ඨාශය විසින් ක්රියාත්මක කළ විශේෂ මෙහෙයුමකට අනුවය. මෙම ජාවාරම සඳහා පොලිසියේ සහ ත්රිවිධ හමුදාවේ ඇතැම් සාමාජිකයින්ගේ සහයෝගය ලැබී ඇති බවට මූලික විමර්ශනවලදී කරුණු අනාවරණය වී ඇති අතර, මෙම රථවාහන සංවිධානාත්මක අපරාධ සඳහා යොදාගෙන ඇති බවට ද පොලිසිය සැක පළ කරයි.
අත්අඩංගුවට ගත් සැකකරුවන්ගෙන් ලද තොරතුරු මත කොළඹ, කඩවත, මීගහවත්ත සහ මොනරාගල යන ප්රදේශවල සඟවා තිබූ මෙම එකලස් කරන ලද රථ සොයා ගැනීමට පොලිසියට හැකි වී තිබේ. මීට අමතරව, තවත් මෙවැනි නීතිවිරෝධී රථ 40කට ආසන්න සංඛ්යාවක් පිළිබඳව තොරතුරු අනාවරණය වී ඇති අතර, ඒවා අත්අඩංගුවට ගැනීම සඳහා පොලිස් කණ්ඩායම් කිහිපයක් මේ වන විටත් දිවයින පුරා වැටලීම් ආරම්භ කර ඇත. මෙම රථවාහන යොදාගෙන සිදු කරන ලද මනුෂ්ය ඝාතන, කොල්ලකෑම් සහ කප්පම් ගැනීම් පිළිබඳව ද ඉදිරියේදී පුළුල් විමර්ශන සිදු කිරීමට නියමිතය.
ඔබේ රථවාහනයක් මීට පෙර සොරකම් කර හෝ අස්ථානගත වී ඇත්නම්, ඒ පිළිබඳව බස්නාහිර උතුර අපරාධ කොට්ඨාශයේ 0112 947 780 යන අංකයට දැනුම් දෙන ලෙස පොලිසිය මහජනතාවගෙන් ඉල්ලා සිටී. අත්අඩංගුවට ගත් සැකකරුවන් තිදෙනා අදාළ බල ප්රදේශවල අධිකරණ වෙත ඉදිරිපත් කිරීමට නියමිත අතර, මෙම මහා පරිමාණ ජාවාරමට සම්බන්ධ අනෙකුත් පුද්ගලයින් සොයා මෙහෙයුම් තවදුරටත් ක්රියාත්මක වේ.
