ඉරානයේ හෝමුස් සමුද්ර සන්ධිය (Strait of Hormuz) විවෘත නොකළහොත් එරට බලාගාර සහ පාලම් විනාශ කරන බවට අමෙරිකානු ජනාධිපති ඩොනල්ඩ් ට්රම්ප් කළ දැඩි තර්ජනයත් සමඟ අද (06) පෙරවරුවේ ලෝක වෙළඳපොළේ බොරතෙල් මිලෙහි කැපී පෙනෙන උච්චාවචනයන් වාර්තා විය.
බ්රෙන්ට් (Brent) බොරතෙල් බැරලයක මිල ඩොලර් 110 ඉක්මවා ගිය අතර, පසුව අමෙරිකාව සහ ඉරානය අතර දින 45ක තාවකාලික සටන් විරාමයක් පිළිබඳ සාකච්ඡා සිදුවන බවට පළ වූ වාර්තාත් සමඟ එම මිල ගණන් සුළු වශයෙන් පහත වැටුණි. කෙසේ වෙතත්, ඉරාන විප්ලවීය ආරක්ෂක බලකාය (IRGC) අනතුරු අඟවා ඇත්තේ තම රටේ සිවිල් යටිතල පහසුකම් ඉලක්ක කළහොත් අමෙරිකානු ආර්ථික මර්මස්ථාන වෙත එල්ල කරන ප්රහාර දැඩි කරන බවයි.
ගෝලීය බලශක්ති අවශ්යතාවයෙන් පහෙන් එකක් සපයන හෝමුස් සමුද්ර සන්ධිය අවහිර වීම හේතුවෙන් ලොව පුරා උද්ධමනය ඉහළ යාමේ දැඩි අවදානමක් මතුව ඇති අතර, OPEC+ සංවිධානය මැයි මාසයේ සිට තෙල් නිෂ්පාදනය සුළු වශයෙන් ඉහළ නැංවීමට එකඟ වී ඇතත් යුදමය වාතාවරණය හමුවේ එය ප්රායෝගිකව ක්රියාත්මක කිරීම ගැටලු සහගත වී තිබේ.
