බලශක්ති අමාත්ය ඉංජිනේරු කුමාර ජයකොඩි මහතාට එල්ල වී ඇති දූෂණ චෝදනා හමුවේ ඔහුව ආරක්ෂා කිරීමට උත්සාහ කිරීම නිසා වත්මන් රජය දැඩි අපහසුතාවයට පත්ව ඇති බව හිටපු අමාත්ය මහාචාර්ය ජී.එල්. පීරිස් මහතා පවසයි. අද (09) කොළඹදී පැවති ඒකාබද්ධ විපක්ෂයේ මාධ්ය හමුවකට එක්වෙමින් මහාචාර්යවරයා සඳහන් කළේ, අමාත්යවරයාට එරෙහිව හෙට (10) පාර්ලිමේන්තුවේදී විවාදයට ගැනීමට නියමිත විශ්වාසභංග යෝජනාව සම්බන්ධයෙන් රජය දක්වන ප්රතිචාරය කිසිසේත් පිළිගත නොහැකි බවයි.
අමාත්යවරයාට එරෙහිව අල්ලස් හෝ දූෂණ විමර්ශන කොමිෂන් සභාව සතුව ප්රමාණවත් සාක්ෂි පවතින බව පෙන්වා දුන් ජී.එල්. පීරිස් මහතා, මෙම චෝදනා එල්ල වී ඇත්තේ ඔහු පොහොර සංස්ථාවේ විධායක තනතුරක් දැරූ සමයේ සිදු වූ ගනුදෙනු සම්බන්ධයෙන් බවත් පැහැදිලි කළේය. අදාළ සිදුවීම අමාත්ය ධුරය භාර ගැනීමට පෙර සිදු වූවක් බව පවසමින් රජය ඉදිරිපත් කරන තර්කය අභූත එකක් බවත්, වරදක් සිදුවී ඇත්නම් එය සිදු වූ කාල වකවානුව අදාළ නොවන බවත් හෙතෙම අවධාරණය කළේය.
මෙවැනි බරපතල චෝදනාවක් පවතින පුද්ගලයෙකු ඉතා වැදගත් අමාත්යාංශයක නායකත්වය දැරීම මහජන සුභසිද්ධියට අහිතකර බවත්, ප්රජාතන්ත්රවාදී සම්ප්රදායන්ට අනුව කුමාර ජයකොඩි මහතා වහාම සිය ධුරයෙන් ඉවත් විය යුතු හෝ ඔහුව ඉවත් කළ යුතු බවත් මහාචාර්යවරයා වැඩිදුරටත් කියා සිටියේය.
