වියට්නාම ජාතිකයන් යුරෝපා සංගමය හරහා බ්රිතාන්යයට නීතිවිරෝධී ලෙස ප්රවාහනය කළ සංවිධානාත්මක මිනිස් ජාවාරම් ජාලයක් විනාශ කිරීමට යුරෝපීය පොලිස් බලකායන් සමත්ව ඇති බව යුරෝපීය පොලිස් ආයතනය (Europol) බ්රහස්පතින්දා ප්රකාශ කළේය. පසුගිය මාර්තු 29 සහ 30 යන දිනවල ප්රංශය, ජර්මනිය සහ හංගේරියාව යන රටවල සිදුකළ වැටලීම්වලදී මෙම ජාලයේ ප්රධානීන් ඇතුළු පුද්ගලයන් අට දෙනෙකු අත්අඩංගුවට ගෙන තිබේ.
මෙම ජාවාරම්කරුවන් වියට්නාම ජාතිකයන් හංගේරියාව හරහා යුරෝපා සංගමයට ඇතුළු කර පසුව ඔවුන්ව බ්රිතාන්යය දක්වා රැගෙන යාම සඳහා එක් අයෙකුගෙන් යුරෝ 22,000ක (ඩොලර් 25,660ක) පමණ මුදලක් අය කර ඇත. මසකට අවම වශයෙන් පුද්ගලයන් 15 දෙනෙකු බැගින් මෙලෙස ප්රවාහනය කර ඇති අතර, පසුගිය වසර කිහිපය තුළ මෙමඟින් ඔවුන් යුරෝ මිලියන 3ක පමණ ආදායමක් උපයා ඇති බවට යුරෝපෝල් ආයතනය සැක පළ කරයි.
ජාවාරමට ලක්වන පුද්ගලයන් ප්රංශයේ පැරිස් නුවර තාවකාලිකව රඳවා තබාගෙන, පසුව කුඩා බෝට්ටු මඟින් ඉංග්රීසි සමුද්ර සන්ධිය හරහා බ්රිතාන්යයට යැවීමට මෙම කණ්ඩායම කටයුතු කර තිබේ. මෙම මෙහෙයුම සඳහා කුර්දි-ඉරාක ජාවාරම් ජාලයක සහය ද මොවුන්ට ලැබී ඇති බව විමර්ශනවලදී හෙළි වී ඇත.
