වැවිලි හා ප්රජා යටිතල පහසුකම් අමාත්යාංශයට අනුබද්ධිත කුරුණෑගල වැවිලි සමාගම 2025 වර්ෂයේ ලැබූ සුවිශේෂී මූල්ය ප්රගතියට දායක වූ සේවක ප්රජාව අගයමින් රුපියල් මිලියන 140 ක ප්රසාද දීමනා මුදලක් ප්රදානය කර තිබේ. මෙය 2024 වසරේ ලබා දුන් රුපියල් මිලියන 70 ක ප්රසාද දීමනාවට සාපේක්ෂව 100% ක කැපී පෙනෙන වර්ධනයකි.
”උත්සහය තුළින් – අභියෝග ජයගත්තෙමු ” යන තේමාව යටතේ කුරුණෑගල Seasons Hotel පරිශ්රයේදී අද (අප්රේල් 10) පැවති මෙම උත්සවය වැවිලි හා ප්රජා යටිතල පහසුකම් අමාත්ය සමන්ත විද්යාරත්න මහතාගේ ප්රධානත්වයෙන් පැවැත්විණි. එහිදී සමාගම ලැබූ රුපියල් මිලියන 634 ක බදු පෙර ලාභයේ ප්රතිලාභ සේවකයින් 1,066 දෙනෙකු අතර මෙලෙස බෙදා දී ඇත.
මෙවර එක් කම්කරු සේවකයෙකු සඳහා අවම වශයෙන් රුපියල් 75,000 ක ප්රසාද දීමනාවක් හිමි වූ අතර එය පසුගිය වසරේ ලබා දුන් රුපියල් 45,000 ක මුදලට වඩා රුපියල් 30,000 ක ඉහළ යාමකි. මීට අමතරව විධායක ශ්රේණියේ නිලධාරීන් සඳහා ද මෙවර වැඩි කළ දිරි දීමනා ප්රදානය කිරීමට පියවර ගෙන තිබේ. සේවක කැපවීම මගින් ආයතනය ලැබූ සාර්ථකත්වය යළි සේවක සුබසාධනය සඳහාම යෙදවීම මෙම වැඩපිළිවෙළේ මූලික අරමුණයි.
