දේශගුණික විපර්යාස, ගෝලීය ආරක්ෂාව සහ අසමානතාවයට එරෙහි සටන වැනි ප්රධාන ක්ෂේත්රවලදී චීනය මීට වඩා තීරණාත්මක කාර්යභාරයක් ඉටු කළ යුතු බව ස්පාඤ්ඤ අගමැති පේද්රෝ සැන්චෙස් (Pedro Sanchez) ප්රකාශ කරයි. ඇමරිකා එක්සත් ජනපදය බොහෝ ගෝලීය නායකත්ව භූමිකාවන්ගෙන් ඉවත් වෙමින් පවතින පසුබිමක, යුරෝපය ද සිය උත්සාහයන් දෙගුණ කළ යුතු බව ඔහු වැඩිදුරටත් පෙන්වා දුන්නේය.
වසර හතරක් තුළ සිය සිව්වන චීන සංචාරය සිදු කරන සැන්චෙස් අගමැතිවරයා, බෙයිජිංහි සිංහුවා විශ්වවිද්යාලයේදී (Tsinghua University) අදහස් දක්වමින් මේ බව පැවසීය. බටහිර රටවල් සහ චීනය අතර වෙළඳ සහ ආරක්ෂක ආතතීන් පවතින නමුත්, බ්රිතාන්යය, අයර්ලන්තය, කැනඩාව සහ ෆින්ලන්තය වැනි රටවල රාජ්ය නායකයින් මෙන්ම ස්පාඤ්ඤය ද චීනය සමඟ පවතින සබඳතා පවත්වා ගැනීමට උනන්දු වෙයි. ස්පාඤ්ඤය සැමවිටම පෙනී සිටින්නේ චීනය භූදේශපාලනික ප්රතිවාදියෙකු ලෙස නොව, උපායමාර්ගික මිතුරෙකු ලෙස සලකා කටයුතු කළ යුතු බවටයි.
දේශගුණික විපර්යාසවලට අමතරව, වගකීම් සහගත කෘතිම බුද්ධිය (AI) සංවර්ධනය සහ න්යෂ්ටික අවි පාලනය සඳහා ද චීනයට වැඩි යමක් කළ හැකි බව ඔහු සඳහන් කළේය. එමෙන්ම ලෙබනනය, ඉරානය, ගාසා තීරය සහ යුක්රේනය වැනි කලාපවල පවතින ගැටුම් නිරවුල් කිරීම සඳහා ජාත්යන්තර නීතියට ගරු කරමින් මැදිහත් වන ලෙස ද ඔහු චීනයෙන් ඉල්ලා සිටියේය.
