සිංහල හා දෙමළ අලුත් අවුරුද්ද වෙනුවෙන් ගම්බිම් බලා යන ජනතාව සඳහා අද (අප්රේල් 13) දිනයේත් මගී අවශ්යතාව අනුව අතිරේක බස් රථ යෙදවීමට ලංකා ගමනාගමන මණ්ඩලය පියවර ගෙන තිබේ. පසුගිය දින කිහිපය තුළ දෛනික කාලසටහනට අමතරව බස් රථ 1,500ක් කොළඹ සිට ධාවනයට එක් කර තිබූ බව ලංකා ගමනාගමන මණ්ඩලයේ සභාපති සංජීව කනගරත්න මහතා සඳහන් කළේය.
හෙට (14) දින නෑගම් යන ජනතාව වෙනුවෙන් ප්රාදේශීය ඩිපෝ මට්ටමින් අවශ්යතාව පරිදි බස් රථ ධාවනය කිරීමට සැලසුම් කර ඇත.
අද සහ හෙට දිනවල දුම්රිය ධාවනය සීමා කිරීමට දුම්රිය දෙපාර්තමේන්තුව තීරණය කර තිබේ. කොළඹ සිට පිට පළාත් බලා යන මගීන්ගේ අඩුවීමක් ඊයේ පස්වරුවේ සිට නිරීක්ෂණය වීම හේතුවෙන් මෙම පියවර ගත් බව දුම්රිය ගමනාගමන අධිකාරී අසංග සමරසිංහ මහතා පැවසීය. කෙසේ වෙතත්, සියලුම සීඝ්රගාමී, තැපැල් සහ නගරාන්තර සීඝ්රගාමී දුම්රියන් සාමාන්ය පරිදි ධාවනය වේ.
