කුමාර් සංගක්කාර ප්රධාන පුහුණුකරු ලෙස කටයුතු කරන රාජස්ථාන් රෝයල්ස් කණ්ඩායමේ කළමනාකරු රෝමි බින්දර්ට (Romie Binder) දූෂණ විරෝධී නීති උල්ලංඝනය කිරීමේ චෝදනා මත ඉන්දීය ක්රිකට් පාලක මණ්ඩලය (BCCI) විමර්ශනයක් ආරම්භ කර තිබේ. පසුගිය සිකුරාදා රෝයල් චැලෙන්ජර්ස් බැංගලෝර් කණ්ඩායම සමඟ පැවති තරගය අතරතුර ඔහු ‘ඩග්අවුට්’ (Dugout) ප්රදේශයේ රැඳී සිටිමින් ජංගම දුරකථනය භාවිත කරන අයුරු කැමරාවල සටහන් වීම මෙම විමර්ශනයට හේතු වී ඇත.
BCCI දූෂණ විරෝධී සහ ආරක්ෂක ඒකකයේ රෙගුලාසිවලට අනුව තරගයක් පැවැත්වෙන අතරතුර ක්රීඩකයන්ට හෝ කණ්ඩායම් නිලධාරීන්ට ඩග්අවුට් ප්රදේශයේදී ජංගම දුරකථන භාවිතය දැඩි ලෙස තහනම් කර තිබේ. මෙම සිද්ධිය සම්බන්ධයෙන් පැය 48ක් ඇතුළත නිදහසට කරුණු ඉදිරිපත් කරන ලෙස ඔහුට දැනුම් දී ඇති අතර, අයි.පී.එල් (IPL) පාලක මණ්ඩලයේ සභාපති අරුන් ධුමාල් ද මේ පිළිබඳව වාර්තාවක් ඉල්ලා ඇත.
කෙසේ වෙතත්, වාර්තා වන අන්දමට රෝමි බින්දර් පෙනහළු ආබාධයක් හේතුවෙන් මීට පෙර දැඩි ලෙස රෝගාතුරව සිටි අයෙකු වන අතර, වෛද්ය හේතූන් මත දුරකථනය ළඟ තබා ගැනීමට ඔහුට අවසර හිමිව තිබූ බව පැවසේ. එහෙත් එම අවසරය දුරකථනය භාවිත කිරීමට අදාළ නොවන බැවින්, ඔහු එම නීති උල්ලංඝනය කළේ ද යන්න පිළිබඳව දැන් දැඩි අවධානයක් යොමු වී තිබේ.
