හෝමුස් සමුද්ර සන්ධියේ (Strait of Hormuz) පවතින උණුසුම්කාරී වාතාවරණය හේතුවෙන් ලෝක වෙළඳපොලේ බොරතෙල් මිල ඉහළ යාම සහ ඇමෙරිකාව තුළ ඉන්ධන මිල සීඝ්රයෙන් වැඩිවීම රිපබ්ලිකන් පක්ෂයේ දේශපාලන අනාගතයට බරපතල තර්ජනයක් වී ඇති බව ෆොක්ස් නිව්ස් (Fox News) නාලිකාවේ ප්රවෘත්ති නිවේදකයෙකු සෘජුවම ප්රකාශ කර තිබේ.
එම නිවේදකයා පෙන්වා දුන්නේ මෙම තත්ත්වය රිපබ්ලිකන් පක්ෂයට ලබන නොවැම්බර් මාසයේ පැවැත්වෙන අතුරු මැතිවරණයෙන් (Midterm Elections) පරාජය වීමට මග පාදනු ඇති බවයි. “ඔබට අතුරු මැතිවරණ ජයග්රහණයට සමුදීමට (Kiss the midterms goodbye) සිදුවනු ඇත. මොකද ඉහළ ගිය ඉන්ධන මිල ගැන ජනතාවට කිසිදාක අමතක වෙන්නේ නැහැ,” යනුවෙන් ඔහු දැඩි ලෙස අවධාරණය කළේය.
ඉරාන යුද්ධය සහ හෝමුස් සමුද්ර සන්ධියේ නාවික අවහිරතාවය හේතුවෙන් ඇමෙරිකාව තුළ ඉන්ධන මිල ගැලුමක් ඩොලර් 6 දක්වා ඉහළ ගොස් ඇති බව වාර්තා වේ. ජනාධිපති ට්රම්ප් විසින්ම මීට පෙර සඳහන් කළේ අතුරු මැතිවරණය දක්වා ඉන්ධන මිල ඉහළ මට්ටමක පවතිනු ඇති බවයි. මෙය රිපබ්ලිකන් පාක්ෂිකයන් අතර පවා දැඩි කනස්සල්ලක් ඇති කර තිබේ. රිපබ්ලිකන් පාක්ෂිකයන්ගෙන් 60%ක් පමණ ඉදිරි මාසවලදී ඉන්ධන මිල දරාගත නොහැකි වනු ඇතැයි බිය පළ කර ඇති බව නවතම මත විමසුම් පෙන්වා දෙයි.
ෆොක්ස් නිව්ස් වැනි රිපබ්ලිකන් පක්ෂයට හිතවාදී නාලිකාවකින් මෙවැනි විවේචනයක් එල්ල වීම විශේෂත්වයකි. යුද්ධය සඳහා සහාය පළ කළද, ඉන් ඇතිවන ආර්ථික පීඩනය හමුවේ සාමාන්ය ජනතාව රිපබ්ලිකන් පක්ෂයෙන් ඈත් වීමේ අවදානමක් පවතින බව මින් පැහැදිලි වේ. මැතිවරණයට පෙර ඉරාන අර්බුදය සමනය කර ඉන්ධන මිල අඩු කිරීමට රජයට නොහැකි වුවහොත්, කොංග්රස් මණ්ඩලයේ බලය රිපබ්ලිකන් පක්ෂයට අහිමි වනු ඇතැයි දේශපාලන විචාරකයෝ අනාවැකි පළ කරති.
තොරතුරු උපුටා ගැනීම: Fox News, PBS සහ Associated Press ඇසුරින්
