රටට බදු ආදායම් උපයන ප්රධානතම මූලාශ්රයක් වන සුරාබදු දෙපාර්තමේන්තුව තුළ, ආයතනයේ කීර්තිනාමය පමණක් නොව සමස්ත රාජ්ය ආදායමම ප්රපාතයට ඇද දමන බිහිසුණු දූෂිත ජාලයක් ක්රියාත්මක වන බවට තොරතුරු අනාවරණය වේ. “තට්ට සෝමේ” යන අන්වර්ථ නාමයෙන් හඳුන්වනු ලබන එක්තරා නියෝජ්ය කොමසාරිස්වරයෙකුගේ ඒකාධිපති සහ දූෂිත වැඩපිළිවෙල හේතුවෙන් මේ වන විට රටට ලැබිය යුතු රුපියල් බිලියන ගණනක බදු ආදායම් අහිමි වෙමින් පවතින බව වාර්තා වේ. මෙම නිලධාරියාගේ අත්තනෝමතික ක්රියාකලාපයට එරෙහිව දෙපාර්තමේන්තුවේම අවංක නිලධාරීන් පිරිසක් විසින් ජනාධිපතිවරයා සහ මුදල් අමාත්යාංශයේ මුල් පුටු වෙත සවිස්තරාත්මක ලිපියක් යොමු කරමින් මෙම මහා පරිමාණ දූෂණය හෙළි කර ඇත.
මෙම නිලධාරියාගේ පත්වීම පවා අනීතික ක්රියාවලියක ප්රතිඵලයක් බවත්, කිසිදු උසස් අධ්යාපන සුදුසුකමකින් තොරව ඔහු මෙම පුටුවට පැමිණ ඇත්තේ මීට පෙර පැවති දූෂිත විභාග “ඩීල්” එකක් හරහා බවත් එම ලිපියෙන් පෙන්වා දෙයි. තම හිතවතුන්ට බාල චීන මත්පැන් ආනයනයට අවසර ලබා දීම, බලපත්රධාරීන්ගෙන් කප්පම් ලබාගැනීමේ අරමුණින් අනවශ්ය පීඩනයන් එල්ල කිරීම සහ සීනි කර්මාන්තයට මරු පහරක් දෙමින් ධාන්ය මගින් එතනෝල් නිෂ්පාදනයට අදාළව සිදුකරන අනිසි මැදිහත්වීම් මෙම දූෂිත ලැයිස්තුවේ ප්රධාන තැනක් ගනී. විශේෂයෙන්ම, නීත්යානුකූලව කටයුතු කරන නිලධාරීන් බිල්ලට දෙමින් ඔවුන්ව අසත්ය චෝදනා මත අල්ලස් කොමිසමට පවා හසු කිරීමට මොහු කටයුතු කරන බවට බරපතල චෝදනා එල්ල වී තිබේ.
සුරාබදු කොමසාරිස් ජනරාල්වරයා පවා නොතකා හරිමින් ක්රියා කරන මෙම “පිළිලය” දෙපාර්තමේන්තුවෙන් ඉවත් නොකළහොත් රටේ බදු ආදායම තවදුරටත් පහළ වැටීම වැළැක්විය නොහැකි බව අදාළ ලිපිය මගින් අවධාරණය කෙරේ. කෘත්රිම රා කර්මාන්තකරුවන් සමඟ සමීප සබඳතා පවත්වමින් බදු වැඩි කිරීමට එරෙහි වන මොහුගේ ක්රියාකලාපය නිසා සෙවණගල හා පැල්වත්ත වැනි දේශීය සමාගම් මෙන්ම අවංක නිලධාරීන්ගේ රැකියා සුරක්ෂිතභාවය ද අද වන විට බරපතල තර්ජනයකට ලක්ව ඇත. මේ වන විට සමස්ත දෙපාර්තමේන්තුවම බලා සිටින්නේ, රටේ ආදායම් කාබාසිනියා කරන මෙම දූෂිත නිලධාරියාට එරෙහිව ජනාධිපතිවරයා ඇතුළු බලධාරීන් කඩිනම් පියවර ගනු ඇතැයි යන දැඩි අපේක්ෂාවෙනි.
