ඊශ්රායලය ගාසා තීරයේ සිදුකරන බව කියන යුද අපරාධවලට විරෝධය පළ කරමින්, යුරෝපා සංගමය සහ ඊශ්රායලය අතර පවතින සබඳතා ගිවිසුම (Association Agreement) සම්පූර්ණයෙන්ම අත්හිටුවන ලෙස ඉල්ලා යුරෝපා වැසියන් මිලියනයක් අත්සන් කළ පෙත්සමක් ඉදිරිපත් කර තිබේ. යුරෝපා සංගමයේ නීතිරීතිවලට අනුව, සාමාජික රටවල් 27 පුරා විසිරී සිටින පුරවැසියන් මිලියනයක් මෙලෙස අත්සන් තැබීම හේතුවෙන්, මේ පිළිබඳව ප්රතිචාර දැක්වීමට යුරෝපා කොමිසමට සහ යුරෝපා පාර්ලිමේන්තුවට දැන් නීතිමය වශයෙන් වගකීමක් පැවරී ඇත.
පසුගිය ඔක්තෝබර් මාසයේ සිට හමාස් සංවිධානය සමඟ සටන් විරාමයක් ක්රියාත්මක වුවද, උතුරු ගාසා තීරයට ඊශ්රායලය එල්ල කරන ප්රහාර තවමත් නතර වී නොමැති බව පෙත්සම්කරුවන් පෙන්වා දෙයි. පෙර නොවූ විරූ අයුරින් සිවිල් වැසියන් ඝාතනය කිරීම, රෝහල් සහ වෛද්ය මධ්යස්ථාන ක්රමවත්ව විනාශ කිරීම මෙන්ම ජාත්යන්තර අධිකරණය (ICJ) ලබාදුන් නියෝග නොතකා කටයුතු කිරීම යන කරුණු පදනම් කරගනිමින් ඊශ්රායලයට එරෙහිව මෙම පියවර ගන්නා ලෙස යුරෝපා පුරවැසියන් බලකර සිටී.
