ඉරාන යුද්ධය හේතුවෙන් ඉහළ ගොස් ඇති බලශක්ති මිල පාලනය කිරීමේ අරමුණින් පාකිස්තානය පුරා දෛනිකව විදුලිය කප්පාදු කිරීමට එරට රජය තීරණය කර තිබේ. ඒ අනුව සෑම දිනකම පස්වරු 5:00 සිට අලුයම 1:00 දක්වා වූ වැඩිම විදුලි ඉල්ලුමක් පවතින කාලය තුළ පැය දෙකයි කාලක (පැය 2 විනාඩි 15) බැගින් විදුලිය අත්හිටුවීමට නියමිත බව පාකිස්තාන බලශක්ති අමාත්යාංශය නිවේදනය කළේය.
පෙබරවාරි 28 වැනිදා ආරම්භ වූ ඇමෙරිකා-ඊශ්රායල සහ ඉරාන යුද්ධය හේතුවෙන් හෝමුස් සමුද්ර සන්ධිය හරහා සිදුවන ඉන්ධන සැපයුම් අඩාල වීම පාකිස්තානයේ බලශක්ති ක්ෂේත්රයට දැඩි බලපෑමක් එල්ල කර ඇති අතර ඉහළ මිලක් සහිත ඉන්ධන භාවිතය අවම කර විදුලි ගාස්තු ඉහළ යාම වැළැක්වීම රජයේ අරමුණයි.
විදුලි උත්පාදනය සඳහා මිල අධික ඉන්ධන භාවිතය අවම කරගැනීම සඳහා මෙම කප්පාදුව සිදුකරන නමුත් දකුණුදිග කලාපයේ පවතින අඩු පිරිවැය සහිත විදුලි උත්පාදන හැකියාව හේතුවෙන් කරච්චි සහ හයිද්රාබාද් යන නගර මෙම කප්පාදුවෙන් නිදහස් කර ඇත.
ලෝක තෙල් සහ ස්වභාවික වායු සැපයුමෙන් පහෙන් එකක් ගමන් කරන හෝමුස් සමුද්ර සන්ධිය හරහා එන සැපයුම් මත පාකිස්තානය දැඩි ලෙස යැපෙන බැවින් පවතින අර්බුදය හමුවේ වැඩි මිලට ඉන්ධන මිලදී ගැනීමට සිදුවීම මෙම තීරණයට ප්රධානතම හේතුව වී තිබේ.
