මතක චිප (memory chips) මිල ඉහළ යාම හේතුවෙන් ස්මාර්ට් ජංගම දුරකථන නිෂ්පාදන පිරිවැය වැඩි වී ඇති පසුබිමක වුවද, 2026 වසරේ පළමු කාර්තුව තුළ චීනයේ ඇපල් (Apple) iPhone අලෙවිය සියයට විස්සකින් (20%) ඉහළ ගොස් ඇති බව කවුන්ටර්පොයින්ට් රිසර්ච් (Counterpoint Research) දත්ත පෙන්වා දෙයි. ලොව විශාලතම ස්මාර්ට් ජංගම දුරකථන වෙළෙඳපොළ වන චීනයේ සමස්ත ජංගම දුරකථන අලෙවිය මෙම කාලසීමාව තුළ 4% කින් පහත වැටී තිබියදී, ඇපල් සමාගම මෙලෙස කැපී පෙනෙන වර්ධනයක් වාර්තා කිරීම විශේෂත්වයකි. සැපයුම් දාමයේ බාධා සහ චිප මිල ඉහළ යාම හමුවේ බොහෝ නිෂ්පාදකයින් සිය මිල ගණන් ඉහළ දැමුවද, ඇපල් නිෂ්පාදනවල පවතින කල්පැවැත්ම පිළිබඳ පාරිභෝගික විශ්වාසය මෙම වර්ධනයට ප්රධාන හේතුව වී තිබේ.
චීන වෙළෙඳපොළ තුළ ඇපල් සමාගමේ ප්රධාන ප්රතිවාදියා වන හුආවේ (Huawei) සමාගම ද 2% ක සුළු වර්ධනයක් වාර්තා කරමින් වෙළෙඳපොළේ ප්රථම ස්ථානය රැකගෙන ඇති අතර ඔවුන් සතු වෙළෙඳපොළ කොටස 20% කි. ඇපල් සමාගම 19% ක වෙළෙඳපොළ කොටසක් හිමිකර ගනිමින් දෙවන ස්ථානයට පත්ව ඇත. බොහෝ නිෂ්පාදකයින් සිය ලාභාංශ රැකගැනීම සඳහා අඩු මිල කාණ්ඩයේ දුරකථනවල මිල ඉහළ දමා ඇති අතර, චීන පාරිභෝගිකයින් වැඩි වශයෙන් උසස් තත්ත්වයේ (High-end) දුරකථන වෙත යොමු වීම හුආවේ සහ ඇපල් යන සමාගම් දෙකටම වාසිදායක තත්ත්වයක් නිර්මාණය කර තිබේ.
