පසුගිය ඉන්ධන අර්බුදය සමයේ ශ්රී ලංකා ඛනිජ තෙල් නීතිගත සංස්ථාව ලෝකයේ වෙනත් කිසිදු රටක් නොගෙවූ අධික මිලකට ඩීසල් බැරලයක් මිලදී ගෙන ඇති බව පිවිතුරු හෙළ උරුමයේ නායක, නීතිඥ උදය ගම්මන්පිල මහතා අද (අප්රේල් 20) පැවැති මාධ්ය හමුවකදී අනාවරණය කළේය.
එච්එස්බීසී (HSBC) බැංකුවේ ප්රධාන විධායක නිලධාරී ජෝර්ජස් එල්හෙඩෙරි කළ ප්රකාශයක් උපුටා දක්වමින් මන්ත්රීවරයා කියා සිටියේ, ලංකාව ඩීසල් බැරලයක් ඩොලර් 286ක් වැනි අතිවිශාල මුදලකට මිලදී ගෙන ඇති බවයි. 2026 අප්රේල් මුල් සතියේ සිංගප්පූරු ප්ලැට්ස් (Platts) මිල දර්ශකයේ ඩීසල් බැරලයක සාමාන්ය මිල ඩොලර් 224ක්ව පැවති අතර, ලංකාව ගෙවා ඇති මිල අනුව එක් බැරලයකට ඩොලර් 62ක අමතර ‘ප්රිමියම්’ (Premium) මුදලක් ගෙවා ඇති බව ඔහු ගණන් බලා පෙන්වා දුන්නේය.
එක් ඉන්ධන නැවක සාමාන්යයෙන් බැරල් ලක්ෂ තුනක් පවතින බැවින්, එක් නැවකින් පමණක් රුපියල් කෝටි 586ක මුදලක් අමතරව ගෙවා ඇති බව මන්ත්රීවරයා සඳහන් කළේය. යුද කලාප හරහා ප්රවාහනය කරන ඉන්ධනවලට වඩා සාමකාමී කලාපවලින් ගෙන්වන ඉන්ධන සඳහා මෙතරම් අධික නැව් ගාස්තු සහ රක්ෂණ මුදල් ගෙවීමට සිදුවූයේ දේශපාලනඥයන්ට සහ තැරැව්කරුවන්ට ගෙවන කොමිස් මුදල් නිසාදැයි ඔහු ප්රශ්න කර සිටියි.
හිටපු බලශක්ති අමාත්යවරයාට සහ රජයට දූෂණ චෝදනා එල්ල කළ ගම්මන්පිල මහතා, තමන් කරන්නේ අසත්ය ප්රකාශයක් නම් තමන්ට එරෙහිව නඩු පවරන ලෙස ද අභියෝග කළේය.
