ඕස්ට්රේලියානු අපනයන මූල්ය නියෝජිතායතනයට (Australian Export Finance Agency) අයත් අරමුදල් වංචනික ලෙස ලබා ගත් හැකර්වරුන්, ඊට අමතරව ඉන්දියාවට කිරීමට තිබූ ගෙවීමක් ද එලෙසම ලබා ගැනීමට උත්සාහ කර ඇති බව මුදල් නියෝජ්ය අමාත්ය ආචාර්ය අනිල් ජයන්ත මහතා අනාවරණය කළේය. බැංකු ගිණුම් අංක නිරන්තරයෙන් වෙනස් වීම නිසා මතු වූ සැකය මත මෙම දැවැන්ත මූල්ය වංචාව පිළිබඳ මුලින්ම කරුණු අනාවරණය වී තිබේ.
මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව (CID), සයිබර් අපරාධ විමර්ශන කොට්ඨාසය සහ ශ්රී ලංකා පරිගණක හදිසි ප්රතිචාර සංසදය (SLCERT) එක්ව පුළුල් විමර්ශනයක් පවත්වයි. මීට අමතරව, මහා භාණ්ඩාගාරයේ නියෝජ්ය ලේකම්වරුන් දෙදෙනෙකුගේ ප්රධානත්වයෙන් යුත් විශේෂ කමිටුවක් මගින් සිදු කළ අභ්යන්තර පරීක්ෂණවල නිර්දේශ මත ඇතැම් නිලධාරීන්ට එරෙහිව දැනටමත් දැඩි විනය පියවර ගෙන ඇත.
මෙම තොරතුරු කලින් හෙළි නොකිරීම සම්බන්ධයෙන් විපක්ෂය නගන චෝදනාවලට පිළිතුරු දෙමින් නියෝජ්ය අමාත්යවරයා පැවසුවේ, මාධ්ය සංදර්ශන පවත්වනවාට වඩා රජයේ ප්රමුඛතාව වූයේ හැකර්වරුන් නීතියේ රැහැනට හසුකර ගනිමින් අහිමි වූ මුදල් නැවත ලබා ගැනීම බවයි. සංවේදී තොරතුරු බාහිරට කාන්දු වීම හැකර්වරුන්ට වාසියක් විය හැකි බැවින් විමර්ශනවල ආරක්ෂාව සඳහා රහස්යභාවය රැකගත් බවත්, ඉදිරියේදී අවශ්ය අවස්ථාවලදී සියලු තොරතුරු ජනතාවට හෙළි කරන බවත් ඔහු වැඩිදුරටත් සඳහන් කළේය.
