ලෝකයේ දැනට පවතින අර්බුදකාරී සහ යුදමය වාතාවරණයන් හමුවේ සාමය සහ සහජීවනය ඇති කිරීමේ අරමුණින් ශ්රී ලංකාවේ ත්රෛනිකායික මහානායක හිමිවරුන් විසින් සකස් කරන ලද විශේෂ සංදේශයක් රටවල් 30ක තානාපතිවරුන් සහ මහා කොමසාරිස්වරුන් වෙත නිල වශයෙන් භාර දී තිබේ. මෙම ඓතිහාසික පියවර මගින් ජාත්යන්තර ප්රජාව වෙත බෞද්ධ දර්ශනයේ අහිංසාවාදය සහ සංහිඳියාව පිළිබඳ පණිවිඩය රැගෙන යාමට අපේක්ෂා කෙරේ.
මල්වතු, අස්ගිරි, අමරපුර සහ රාමඤ්ඤ යන නිකායන්හි මහානායක හිමිවරුන්ගේ අත්සනින් යුතුව සකස් කළ මෙම සංදේශය මගින් ප්රධාන වශයෙන් අවධාරණය කර ඇත්තේ මැදපෙරදිග ඇතුළු කලාපීය ගැටුම් සාමකාමීව විසඳා ගැනීමේ අවශ්යතාවයයි. මානව හිමිකම් සුරැකීම, යුද්ධයෙන් පීඩා විඳින ජනතාවට සහන සැලසීම සහ ලෝක සාමය වෙනුවෙන් රාජ්යතාන්ත්රික මට්ටමින් ගත හැකි උපරිම ක්රියාමාර්ග පිළිබඳව මෙහිදී කරුණු දක්වා ඇත.
කොළඹදී පැවති විශේෂ හමුවකදී මෙම සංදේශය තානාපතිවරුන් වෙත පිළිගන්වන ලද අතර, එම රටවල රාජ්ය නායකයන් වෙත මෙම පණිවිඩය කඩිනමින් යොමු කරන ලෙස මහානායක හිමිවරුන් මෙහිදී ඉල්ලීමක් කළහ. ආගමික නායකයන් වශයෙන් ලෝක සාමය වෙනුවෙන් මැදිහත් වීම කාලීන අවශ්යතාවක් බවත්, මෙරට බෞද්ධ නායකත්වය ජාත්යන්තර වශයෙන් සිදු කළ මෙම මැදිහත්වීම තානාපතිවරුන්ගේ ද ඇගයීමට ලක්විය.
