විදේශ ණය ගෙවීමට වෙන් කර තිබූ ඇමෙරිකානු ඩොලර් ලක්ෂ 25ක (ඩොලර් මිලියන 2.5) මුදලක් සයිබර් අපරාධකරුවන් අතට පත්වීමේ සිද්ධිය සම්බන්ධයෙන් විධිමත් විමර්ශනයක් කිරීම සඳහා පාර්ලිමේන්තුව වහාම කැඳවන ලෙස විපක්ෂය අග්රාමාත්යවරියගෙන් ඉල්ලීමක් කරයි. මෙම බරපතළ මූල්ය නාස්තිය පිළිබඳව කරුණු පැහැදිලි කිරීමට රජය මෙතෙක් අපොහොසත් වී ඇති බවට විපක්ෂය චෝදනා කරයි.
සමගි ජන බලවේගයේ කොළඹ දිස්ත්රික් මන්ත්රී මුජිබර් රහුමාන් මහතා පෙන්වා දෙන්නේ මෙම සිදුවීම සිදුවී මාස හයකට අධික කාලයක් ගතවී තිබියදීත්, ඒ පිළිබඳව පාර්ලිමේන්තුව දැනුවත් කිරීමට රජය පියවර නොගැනීම බරපතළ වරදක් බවයි. ලබන මැයි මස 5 වැනිදා පාර්ලිමේන්තුව රැස්වීමට නියමිතව තිබුණද, පවතින තත්ත්වයේ බරපතළකම සලකා බලා ලබන සතියේදී විශේෂ පාර්ලිමේන්තු වාරයක් කැඳවන ලෙස විපක්ෂ මන්ත්රීවරු බලකර සිටිති.
මේ අතර, විපක්ෂ නායක සජිත් ප්රේමදාස මහතා අවධාරණය කරන්නේ මෙම මූල්ය අක්රමිකතාව පිළිබඳව සොයා බැලීමට වහාම පාර්ලිමේන්තු විශේෂ කාරක සභාවක් (Select Committee) පත් කළ යුතු බවයි. එම කාරක සභාවේ විනිවිදභාවය තහවුරු කිරීම සඳහා එහි සභාපතිත්වය සහ බහුතර සාමාජිකත්වය විපක්ෂයට ලබා දිය යුතු බව ද ඔහු වැඩිදුරටත් ප්රකාශ කළේය.
