ඉරානය විසින් හොර්මුස් සමුද්ර සන්ධිය “ආර්ථික න්යෂ්ටික අවියක්” ලෙස භාවිතා කරමින් මුළු ලෝකයටම තර්ජනය කරන බවට අමෙරිකානු රාජ්ය ලේකම් මාර්කෝ රූබියෝ මහතා චෝදනා කර සිටියි.
ඉරානයේ කොන්දේසි මත මෙම තීරණාත්මක මුහුදු මාර්ගය නැවත විවෘත කිරීමට හෝ ඔවුන්ගේ න්යෂ්ටික වැඩසටහන පිළිබඳ සාකච්ඡා කල් දැමීමට වොෂින්ටනය සූදානම් නැති බව රූබියෝ මහතා අවධාරණය කළේය.
හොර්මුස් සමුද්ර සන්ධිය විවෘත කිරීමට සහ පවතින යුද්ධය අවසන් කිරීමට ඉරානය විසින් නව යෝජනාවක් ඉදිරිපත් කර ඇත. කෙසේ වෙතත්, න්යෂ්ටික වැඩසටහන පිළිබඳ සාකච්ඡා පසු අදියරකට කල් දැමිය යුතු බවට ඔවුන් කොන්දේසියක් පනවා තිබේ.
ඉරානය විසින් සමුද්ර සන්ධිය විවෘත කළ ද, එය ඔවුන්ගේ අවසරය මත හෝ මුදල් ගෙවා සිදු කළ යුතු නම් එය සැබෑ විවෘත කිරීමක් නොවන බව රූබියෝ මහතා පවසයි. මෙම මුහුදු මාර්ගය ජාත්යන්තර මුහුදු කලාපයක් බවත්, ඉරානයේ ක්රියාකලාපය භයානක පූර්වාදර්ශයක් සපයන බවත් ඔහු පෙන්වා දෙයි.
අමෙරිකානු ජනාධිපති ඩොනල්ඩ් ට්රම්ප් මහතා ඉරානයේ මෙම යෝජනාව පිළිබඳව සෑහීමකට පත් වී නොමැති බව ධවල මන්දිර ආරංචි මාර්ග පවසයි. ඉරානයේ න්යෂ්ටික වැඩසටහන සම්පූර්ණයෙන්ම අහෝසි කළ යුතු බව ජනාධිපතිවරයාගේ ස්ථාවරයයි.
තමන් න්යෂ්ටික අවි නිපදවීමට උත්සාහ නොකරන බව පවසන ටෙහෙරානය, යුරේනියම් තොග ඉවත් කිරීමට අමෙරිකාව කරන ඉල්ලීම් දිගින් දිගටම ප්රතික්ෂේප කරමින් සිටියි.
