මලයගම් ජනතාවගේ මෙවර මැයි දින පෙළපාලිය සහ රැලිය ජනාධිපති අනුර කුමාර දිසානායක මහතාගේ ප්රධානත්වයෙන් මැයි 01 වනදා නුවරඑළිය සිනෙසිටා ක්රීඩාංගණයේදී පැවැත්වෙන බව සමස්ත ලංකා වතු කම්කරු සංගමය පවසයි. මේ පිළිබඳ දැනුවත් කිරීමේ මාධ්ය හමුවක් හැටන් දික්ඔය නගර සභා ශාලාවේදී පවත්වා තිබේ.
මෙවර මැයි දින පෙළපාලිය සහ රැලිය සංවිධානය කරනු ලබන්නේ වතු කම්කරුවන් නගා සිටුවීමට වත්මන් රජය කෙටි කාලයක් තුළ සිදු කර ඇති වැඩකටයුතු පාදක කර ගනිමිනි.
දිවයිනේ දිස්ත්රික්ක 22ක් කේන්ද්ර කර ගනිමින් ඉතිහාසයේ මෙතෙක් පවත්වා නැති ආකාරයේ මැයි දින රැලි මාලාවක් පැවැත්වීමට ජාතික ජන බලවේගය කටයුතු යොදා ඇත. මෙම සෑම රැස්වීමකටම ජනාධිපතිවරයා ඇතුළු මැති ඇමතිවරුන් සහභාගී වීමට නියමිතය.
විපක්ෂය පක්ෂ ගණනාවක් එක්ව මැයි දිනයක් පැවැත්වීමට සැරසුණ ද ඊට බහුතර ජනතාවක් සහභාගී නොවන බවත්, විපක්ෂය එල්ල කරන විවිධ චෝදනාවලට ජනාධිපතිවරයා මැයි දිනයේදී පිළිතුරු ලබා දෙන බවත් නුවරඑළිය දිස්ත්රික් පාර්ලිමේන්තු මන්ත්රීනී ක්රිෂ්ණන් කලෙයිචෙල්වි මෙනවිය මෙහිදී ප්රකාශ කළාය.
මෙම මාධ්ය හමුව සඳහා සමස්ත ලංකා වතු කම්කරු සංගමයේ සභාපති කිට්නන් සෙල්වරාජ් මහතා සහ ලේකම් සී.එම්.ඒ. ප්රේමරත්න මහතා ඇතුළු පිරිසක් එක්ව සිටියහ.
