සතුටින් පිරුණු රාත්රී සාදයක් පැය කිහිපයක් ඇතුළත මුළු පවුලක්ම බිලිගන්නා මාරක උගුලක් වනු ඇතැයි මුම්බායි හි පයිදෝනි ප්රදේශයේ කිසිවෙකුත් සිහිනෙකින්වත් සිතන්නට නැත. පසුගිය අප්රේල් 25 වැනිදා රාත්රියේ සිය සමීපතම ඥාතීන් ද සමඟ බුරියානි සහ චිකන් පිලාෆ් භුක්ති විඳි අබ්දුල්ලා දොකාඩියාගේ පවුලට, එම සාදය සිය ජීවිතයේ අවසන් හමුවීම වනු ඇතැයි දෛවය සරදම් කර තිබුණි. සාදය නිමවී ඥාතීන් පිටව යන තෙක්ම කිසිදු අසනීප තත්ත්වයක් පෙන්වා නොදුන් මෙම පවුලේ සාමාජිකයන් සිව්දෙනා, අලුයම 1.00ට පමණ අතුරුපසක් ලෙස භුක්ති විඳි එක් පලතුරක් ඔවුන්ගේ ඉරණම මුළුමනින්ම උඩුයටිකුරු කිරීමට සමත් විය.
අලුයම 5.00 වන විට අබ්දුල්ලා, ඔහුගේ බිරිඳ නස්රීන් සහ දියණියන් දෙදෙනා වූ අයේෂා හා සයිනබ් යන සිව්දෙනාටම දැඩි වමනය, පාචනය සහ කරකැවිල්ල මතු වූ අතර වහාම රෝහල්ගත කළ ද වෛද්යවරුන්ට ඔවුන්ව බේරා ගැනීමට අවස්ථාවක් හිමි නොවීය. ඉරිදා උදෑසන 13 හැවිරිදි කුඩා සයිනබ්ගෙන් ඇරඹුණු මරණයේ හෝරාව, පැය කිහිපයක් ඇතුළත මව සහ වැඩිමල් දියණිය ද බිලිගත් අතර සිය පවුලම දෑස් ඉදිරිපිට සමුගනු දුටු පියා ද එදින රාත්රියේම මෙලොව හැර ගියේය. වෛද්යවරුන් සැක කරන්නේ ඔවුන් අතුරුපස ලෙස අනුභව කළ පැණි කොමඩු ගෙඩිය තුළ අතිශය විෂ සහිත රසායනිකයක් හෝ කෘමිනාශකයක් අඩංගු වී තිබෙන්නට ඇති බවයි.
මෙම මරණ හුදෙක් සාමාන්ය ආහාර විෂ වීමක් නොවන බවට සැක කරන පොලිසිය, අඩක් ආහාරයට ගත් පැණි කොමඩු කොටස සහ අනෙකුත් ආහාර සාම්පල කලිණා අධිකරණ වෛද්ය විද්යාගාරය වෙත යවා ඇත්තේ මේ පිටුපස ඇති බිහිසුණු රහස අනාවරණය කර ගැනීමටය. අප්රේල් 27 වැනිදා මරීන් ලයින්ස් සොහොන් භූමියේදී එකම පස් ගොඩකින් වසා දැමුණු මේ පවුලේ ඛේදවාචකය, අප එදිනෙදා වෙළඳපොළෙන් මිලදී ගන්නා පලතුරු කෙතරම් දුරට සුරක්ෂිත ද යන බරපතල ප්රශ්නය මුළු මහත් සමාජය හමුවේම ඉතිරි කර තිබේ. පරීක්ෂණ වාර්තා එනතුරු සැබෑව සැඟවී තිබුණ ද, නොසලකා හරින සුළු ආහාර පරීක්ෂාව ඔබේ සමීපතයන්ගේ ජීවිත පවා අහිමි කළ හැකි මාරක අවදානමක් බව අමතක නොකරන්න.
