2026 වසරේ වෙසක් පොහොය සහ වෙසක් සතිය ප්රකාශයට පත් කිරීමේදී සිදු වූ වෙනස්කම් හේතුවෙන් හජ්ජි සැමරුම සහ වෙසක් සතිය එකම කාලසීමාවක යෙදී තිබීම පිළිබඳව මේ වන විට සමාජ මාධ්ය ඔස්සේ දැඩි කතාබහක් නිර්මාණය වී තිබේ.
මුලින් මැයි 01 වනදාට වෙසක් පොහොය යෙදී තිබුණද, එදිනට “විසා” නැකත නොයෙදීම හේතුවෙන් වෙසක් උත්සවය මැයි 30 වනදා දක්වා කල් දැමීමට රජය තීරණය කළේය. මෙය මහානායක හිමිවරුන්ගේ සහ ශාසනාරක්ෂක මණ්ඩලයේ ඉල්ලීම පරිදි, විද්යාත්මක හා ආගමික පදනමක් මත ගනු ලැබූ තීරණයකි. ඒ අනුව 2026 මැයි 27 සිට ජූනි 02 දක්වා වෙසක් සතිය ලෙස නම් කර ඇත.
හජ්ජි සැමරුම සහ මතුව ඇති ගැටලුව
නව දින දර්ශනයට අනුව ප්රකාශිත වෙසක් සතිය තුළම, එනම් මැයි 28 වන දිනට ඉස්ලාම් භක්තිකයන්ගේ සුවිශේෂී උත්සවයක් වන හජ්ජි සැමරුම ද යෙදී තිබේ. මේ සම්බන්ධයෙන් මුස්ලිම් ප්රජාව සහ සිවිල් ක්රියාකාරීන් සිය අදහස් දක්වමින් පෙන්වා දෙන්නේ රජය මෙම තීරණය ගැනීමේදී අනෙකුත් ආගමික උත්සව පිළිබඳව ප්රමාණවත් අවධානයක් යොමු නොකළ බවයි.
විශේෂයෙන්ම මාධ්යවේදීන් සහ සමාජ ක්රියාකාරීන් පෙන්වා දෙන්නේ, එකම කාලසීමාවක ප්රධාන ආගමික උත්සව දෙකක් යෙදීම නිසා උත්සව සංවිධාන කටයුතුවලදී සහ සැමරුම් පැවැත්වීමේදී යම් යම් ප්රායෝගික අපහසුතා මතු විය හැකි බවයි. මෙය ආගමික සහජීවනයට බලපෑමක් නොවන පරිදි කළමනාකරණය කරගැනීමේ වැදගත්කම පිළිබඳව ද සමාජ මාධ්ය තුළ විවිධ අදහස් පළ වෙමින් පවතී.
කෙසේ වෙතත්, මෙම දින සංශෝධනය සිදු කර ඇත්තේ ශාසනික අවශ්යතාවයක් මත බවත්, එය කිසිසේත්ම වෙනත් ආගමික උත්සවයක් අවතක්සේරු කිරීමේ අරමුණින් සිදු වූවක් නොවන බවත් රජයේ පාර්ශවයෙන් වක්රව පැහැදිලි කෙරේ.
