රජය විසින් අධිකරණය ඉලක්ක කර ගනිමින් සිදු කරන ප්රකාශ වහාම නතර කළ යුතු බව විපක්ෂයේ මන්ත්රීවරුන් අවධාරණය කරනවා. විපක්ෂ නායක කාර්යාලයේ මාධ්ය ඒකකය නිවේදනයක් නිකුත් කරමින් සඳහන් කරන්නේ, පසුගිය මැයි රැලියේදී ජනාධිපතිවරයා විසින් කරන ලද ප්රකාශය වහාම ඉල්ලා අස්කර ගත යුතු බවයි. එළඹෙන 25 වන දින ප්රකාශයට පත් කිරීමට නියමිත නඩු තීන්දුවකින් පසු අත්පොලසන් දීමට සූදානම් වන ලෙස ජනාධිපතිවරයා සිදු කළ ප්රකාශය, අධිකරණයේ ස්වාධීනත්වයට එල්ල කළ බරපතළ තර්ජනයක් ලෙස ඔවුන් පෙන්වා දෙනවා.
මෙම ප්රකාශය හරහා අධිකරණය විධායකයේ අභිමතයට යටත් කර ගැනීමට උත්සාහ කරන බවත්, අධිකරණය ලබාදීමට නියමිත තීන්දුවක් පිළිබඳව ජනාධිපතිවරයාට පූර්ව දැනුමක් ඇති බවක් ඉන් ගම්ය වන බවත් විපක්ෂය පවසනවා. යුක්තිය ඉටුවීම පමණක් නොව එය පැහැදිලිව හා නිසැකවම පෙනෙන්නට තිබීම ආණ්ඩුක්රම ව්යවස්ථාවේ මූලික මූලධර්මයක් බවත්, අධිකරණය වගකීමට බැඳී ඇත්තේ ආණ්ඩුක්රම ව්යවස්ථාවට මිස විධායකයට නොවන බවත් එම නිවේදනයේ වැඩිදුරටත් සඳහන්. ශ්රී ලංකාවේ අධිකරණයට බලය ලැබෙන්නේ ජනතාවගෙන් සහ ආණ්ඩුක්රම ව්යවස්ථාවෙන් මිස ජනාධිපතිවරයෙකුගේ හෝ දේශපාලන සන්ධානයක අභිමතය පරිදි නොවන බව පවසන විපක්ෂය, අධිකරණය ආරක්ෂා කර ගැනීමට ප්රජාතන්ත්රවාදී රාමුව තුළ උපරිමයෙන් කැප වන බව ද අවධාරණය කරනවා.
