ශ්රී ලංකාවේ පෞද්ගලික බස් කර්මාන්තය මුහුණ දී ඇති දැවැන්ත මූල්ය සහ තාක්ෂණික අර්බුදයට ඇති එකම තිරසාර විසඳුම විදුලි බස් රථ වෙත යොමු වීම බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා පවසයි. අම්කොට් (Amcot) සංස්ථාව සහ ලංකා පෞද්ගලික බස් හිමියන්ගේ සංගමය අතර විදුලි බස් රථ ව්යාපෘතියක් ආරම්භ කිරීම සඳහා අවබෝධතා ගිවිසුමක් අත්සන් කිරීමේ උත්සවයකදී ඔහු මෙම අදහස් පළ කළේය. මෙරට පොදු ප්රවාහන ක්ෂේත්රයේ හැරවුම් ලක්ෂ්යයක් ලෙස සැලකෙන මෙම ව්යාපෘතියේ පළමු අදියර යටතේ ඉදිරි මාස දෙක ඇතුළත විදුලි බස් රථ 100ක් ආනයනය කර නගර ප්රවාහන සේවා සඳහා යොදවන බව ඔහු සඳහන් කළේය.
මෙම නවතම විදුලි බස් රථ සූර්ය බලශක්තියෙන් ආරෝපණය කළ හැකි බැටරි මගින් ක්රියාත්මක වන අතර ඒවා සඳහා වසර හතක වගකීමක් ද හිමිවේ. මූලික අදියරේදී මෙම බස් රථ හොරණ සහ කොළඹ අතර මාර්ගයේ ධාවනය කිරීමට නියමිත අතර එම මාර්ගය පුරා ආරෝපණ මධ්යස්ථාන 200ක් පමණ ස්ථාපනය කිරීමට සැලසුම් කර ඇත. විනාඩි 45ක් වැනි කෙටි කාලයකදී පූර්ණ ආරෝපණයක් ලබාගත හැකි මෙම බස් රථයකට එක් වරක් ආරෝපණය කිරීමෙන් කිලෝමීටර් 350ක දුරක් ධාවනය කළ හැකිය. වැට් බදු ඉහළ යාම සහ ඉන්ධන පිරිවැය ඉහළ යාම හමුවේ දැඩි පීඩනයකට පත්ව සිටින බස් හිමියන්ට මෙය ඉතා සහනදායී පියවරක් වනු ඇතැයි විජේරත්න මහතා පෙන්වා දුන්නේය.
වර්තමානයේ භාවිත කරන ඩීසල්වල පවතින සල්ෆර් ප්රමාණය නීත්යානුකූල මට්ටමට වඩා බෙහෙවින් ඉහළ ගොස් ඇති බැවින් බස් රථ එන්ජින්වලට හානි සිදුවන බවට ද ඔහු මෙහිදී චෝදනා කළේය. මේ අතර අම්කොට් සංස්ථාවේ සභාපති හර්බි සිල්වා මහතා සඳහන් කළේ වසරක් ඇතුළත හොරණ ප්රදේශයේ කර්මාන්තශාලාවක් ආරම්භ කර දේශීයව මෙම විදුලි බස් රථ නිෂ්පාදනය කිරීමට බලාපොරොත්තු වන බවයි. මෙරට බස් රථ අවශ්යතාවයෙන් 30%ක් දේශීයව සපුරාලීමටත් ඉදිරියේදී යුරෝපය සහ මැදපෙරදිග වෙළඳපොළට විදුලි වාහන අපනයනය කිරීමටත් ඔවුන් සැලසුම් කර ඇත.
