වසර දෙකකට වැඩි කාලයකට පසුව ඇමරිකානු ඩොලරයට සාපේක්ෂව ශ්රී ලංකා රුපියලේ අගය රුපියල් 324 සීමාව ඉක්මවා යමින් ඊයේ (06) දිනයේදී කැපී පෙනෙන පහළ යාමක් වාර්තා කළේය. ශ්රී ලංකා මහ බැංකුව විසින් නිකුත් කරන ලද නිල විනිමය අනුපාතිකයන්ට අනුව ඩොලරයේ ගැනුම් මිල රුපියල් 316.40ක් ලෙසත් විකුණුම් මිල රුපියල් 324.03ක් ලෙසත් සටහන් විය. ලෝක වෙළඳපොළේ පවතින අස්ථාවරත්වය සහ මෙරට තුළ ඩොලර් සඳහා පවතින ඉල්ලුම ඉහළ යාම මෙම තත්ත්වයට ප්රධාන වශයෙන් බලපා ඇති බව ආර්ථික විද්යාඥයෝ පෙන්වා දෙති.
මෙම රුපියල අවප්රමාණය වීම හුදු මුදල් ඒකකයක අගය වෙනස් වීමක් පමණක් නොව, එය රටේ සමස්ත ආර්ථික ශේෂ පත්රයටම (National Balance Sheet) එල්ල කරන බරපතල තර්ජනයක් බව ආර්ථික විශේෂඥ ආචාර්ය කෙනත් ද සිල්වා මහතා පවසයි. ශ්රී ලංකාව සතුව ඇමරිකානු ඩොලර් බිලියන 66.5ක දැවැන්ත විදේශීය ණය ප්රමාණයක් පවතින අතර ඊට සාපේක්ෂව පවතින විදේශීය වත්කම් ප්රමාණය ඩොලර් බිලියන 16.1ක් වැනි අඩු අගයක පවතී. රුපියල අවප්රමාණය වන සෑම අවස්ථාවකම මෙම ණය ප්රමාණය රුපියල්වලින් ගණනය කිරීමේදී අතිවිශාල ලෙස ඉහළ යන බැවින් රටේ ශුද්ධ වටිනාකම සීඝ්රයෙන් පහළ යන බව ඔහු අවධාරණය කළේය.
සංචාරක කර්මාන්තය සහ විදේශ ප්රේෂණ හරහා මෑතකදී මෙරට ආර්ථිකයේ යම් ස්ථාවරත්වයක් දක්නට ලැබුණද, පවතින අධික විදේශ ණය බර හමුවේ මෙවැනි විනිමය කම්පන දරා ගැනීම ඉතා දුෂ්කර වනු ඇත. මේ වන විටත් ඉහළ බදු බරින් සහ බලශක්ති පිරිවැයෙන් පීඩා විඳින මෙරට ව්යාපාරික ප්රජාවට සහ සාමාන්ය ජනතාවට මෙම රුපියල අවප්රමාණය වීම හමුවේ භාණ්ඩ හා සේවා මිල තවදුරටත් ඉහළ යාමෙන් දැඩි ආර්ථික පීඩනයකට මුහුණ දීමට සිදුවනු ඇතැයි අනතුරු ඇඟවේ.
