නුවරඑළිය මහ නගර සභාව සතු පුස්තකාල ගොඩනැගිල්ල සහ ශ්රවණාගාරය තැපැල් කාර්යාලයට ලබාදීමේ තීරණය, ජාතික ජන බලවේග පක්ෂ මූලස්ථානයේ (පැලවත්ත) උවමනාව මත නගරාධිපතිවරයා සභාව නොමඟ යවා ගත් තීරණයක් බව නියෝජ්ය නගරාධිපති සිවන්ජෝති යෝග රාජා මහතා අද (07) චෝදනා කළේය.
ළමා පුස්තකාලය සහ ශ්රවණාගාරය මසකට රුපියල් 25,000ක සොච්චම් මුදලකට තාවකාලිකව ලබාදීමට පසුගිය සභාවේදී යෝජනා සම්මත කරගෙන ඇත්තේ නගර සභා ආඥා පනතට පටහැනිව බව නියෝජ්ය නගරාධිපතිවරයා පෙන්වා දුන්නේය. සභාව ආරම්භ වීමට විනාඩි කිහිපයකට පෙර ලැබුණු “තුන්ඩු කැබැල්ලක්” මඟින් පක්ෂයේ උවමනාව මත මෙම යෝජනාව ඉදිරිපත් කරන ලෙස දැනුම් දුන් බවත්, මන්ත්රීවරුන්ට එය කියවා බැලීමට හෝ කාලයක් නොදී අත්තනෝමතික ලෙස සම්මත කරගත් බවත් ඔහු අනාවරණය කළේය.
මෙම ක්රියාව හේතුවෙන් සභාවට දැඩි මහජන විරෝධයක් එල්ල වී ඇති බවත්, මින් ඉදිරියට මන්ත්රීවරුන් නොමඟ යවමින් මෙලෙස පක්ෂයේ උවමනාවන් ඉටු නොකරන ලෙසත් ඔහු නගරාධිපතිවරයාට අවධාරණය කළේය. ලංකා කම්කරු කොංග්රසය නියෝජනය කරන නියෝජ්ය නගරාධිපතිවරයාගේ සහයෝගය මත පාලන බලය පවත්වාගෙන යන සභාව තුළම මෙවැනි විරෝධයක් මතු වීම විශේෂත්වයකි.
