නෝර්වුඩ් නගරයේ බගවන්තලාව මාර්ගයේ අලුතින් විවෘත කිරීමට සැලසුම් කර තිබූ මත්පැන් හලකට විරෝධය පළ කරමින් වතු කම්කරුවන් සහ ප්රදේශවාසීන් කළු කොඩි ඔසවා දැවැන්ත උද්ඝෝෂණයක නිරත විය. පසුගිය මැයි 06 වනදා සංවිධානය කර තිබූ මෙම විරෝධතාවය හේතුවෙන් නෝර්වුඩ් නගරයේ සියලුම වෙළඳසැල් වසා දමා කළු කොඩි ඔසවා තිබූ බව වාර්තා වේ.
නගරයේ දැනටමත් මත්පැන් හල් 3ක් පවතින පසුබිමක, තවත් ස්ථානයක් විවෘත කිරීමෙන් වතු ප්රජාවගේ ආර්ථික සහ සමාජයීය තත්ත්වය තවදුරටත් පිරිහීමට ලක්වන බව විරෝධතාකරුවෝ පෙන්වා දෙති. විශේෂයෙන්ම මෙම මත්පැන් හල පිහිටි ගොඩනැගිල්ලේ ඉහළ මහළේ පෞද්ගලික උපකාරක පන්තියක් පවත්වාගෙන යාම නිසා සිසු සිසුවියන්ට සිදුවන පීඩාව පිළිබඳව ද ඔවුහු සිය අප්රසාදය පළ කර සිටියහ.
නෝර්වුඩ් ප්රාදේශීය සභාවේ සභාපති (ජාතික ජන බලවේගයේ) ෆ්රැන්සිස් ඇළන් මහතා ප්රකාශ කළේ, මෙම මත්පැන් හලට අවසර නොදෙන ලෙස සභාව තීරණය කර තිබියදීත් සුරාබදු දෙපාර්තමේන්තුව මෙලෙස කටයුතු කිරීම පිළිගත නොහැකි බවයි. කෙසේ වෙතත්, නුවරඑළිය දිස්ත්රික් පාර්ලිමේන්තු මන්ත්රී මංජුල සුරවීර ආරච්චි මහතා සඳහන් කළේ මෙය අලුත් බලපත්රයක් නොව, නෝටන්බ්රිජ් ප්රදේශයේ තිබූ මත්පැන් හලක් ස්ථාන මාරු කිරීමක් බවයි.
පවතින මහජන විරෝධය සලකා බලා, ප්රදේශවාසීන් සමඟ සාකච්ඡා කර විසඳුමකට එළඹෙන තෙක් මත්පැන් හල විවෘත නොකිරීමට පියවර ගන්නා බව මන්ත්රීවරයා වැඩිදුරටත් සහතික විය.
