බ්රිතාන්ය පාර්ලිමේන්තුව නියෝජනය කරන සර්ව පාර්ශවික මන්ත්රී කණ්ඩායමක් වසර හතකට පසු ප්රථම වතාවට මෙම මස මැද භාගයේදී චීනයේ සංචාරය කිරීමට නියමිත බව රොයිටර් පුවත් සේවය වාර්තා කරයි. 2019 වසරෙන් පසු බ්රිතාන්ය මන්ත්රීවරුන් පිරිසක් නිල වශයෙන් චීනයට යන පළමු අවස්ථාව මෙය වන අතර, පසුගිය ජනවාරි මාසයේදී බ්රිතාන්ය අග්රාමාත්ය කියර් ස්ටාර්මර් සිදු කළ චීන සංචාරයෙන් පසු දෙරට අතර සබඳතා යළි යහපත් වීමේ ලකුණක් ලෙස මෙය සැලකේ.
කම්කරු පක්ෂය සහ කොන්සර්වේටිව් පක්ෂය නියෝජනය කරන මන්ත්රීවරුන් 12 දෙනෙකුගෙන් සමන්විත මෙම කණ්ඩායම දින පහක කාලයක් චීනයේ රැඳී සිටීමට නියමිතය. විදේශ හා පොදුරාජ්ය මණ්ඩලීය කාර්යාලය මඟින් මූල්ය ප්රතිපාදන සපයන රාජ්ය නොවන සංවිධානයක් වන ‘Great Britain-China Centre’ මඟින් මෙම සංචාරය සංවිධානය කර ඇත. මීට පෙර කොරෝනා වසංගතය, මානව හිමිකම් චෝදනා සහ ඔත්තු බැලීම් සම්බන්ධ මතභේද හේතුවෙන් දෙරට අතර සබඳතා දැඩි ලෙස පිරිහී තිබුණි.
විශේෂයෙන්ම 2021 වසරේදී ෂින්ජියැං කලාපයේ මානව හිමිකම් උල්ලංඝනය කිරීම් සම්බන්ධයෙන් අසත්ය ප්රචාර පතුරුවන බවට චෝදනා කරමින් චීනය විසින් බ්රිතාන්ය මන්ත්රීවරුන් කිහිප දෙනෙකුට සම්බාධක පනවා තිබුණි. කෙසේ වෙතත්, අග්රාමාත්ය ස්ටාර්මර් සහ ජනාධිපති ෂී ජින්පින් අතර පැවැති සාකච්ඡාවලින් පසු එම සම්බාධක ඉවත් කර සබඳතා යළි ස්ථාපිත කිරීමට දෙපාර්ශ්වයම එකඟ වී තිබේ. එසේ වුවද, ඔත්තු බැලීමේ චෝදනා සහ ලන්ඩනයේ ඉදිකිරීමට නියමිත චීන තානාපති කාර්යාලය සම්බන්ධ ගැටලු තවමත් දෙරට අතර මතභේදාත්මක තත්ත්වයේ පවතී.
